முந்தைய ஆண்டு சாதனையை
முறியடிக்கவே
இன்று உன்கையில்
புதிய டைரி

டைரியின்
கோடிட்ட இடங்களை நிரப்ப
அங்கும் இங்கும் திறந்தே உள்ளன
ஆயிரம் பொன்கதவுகள்

வாரத்தின் ஏழுநாள்களும்
வாழ்க்கைக்கு வண்ணம் தீட்டும்
வானவில்

மாதத்தின் முப்பது நாள்களும்
ஆபரணப் பொன்னள்ளித் தரும்
அட்சய திருதியைகளே

ஆண்டின் 365 நாள்களும்
நீ
சிகரம் தொடச்
செதுக்கிய சித்திரப்படிகள்
உன்
டைரியின் பக்கங்களில்
வாசம் தெளிக்க
வரிசையில் நிற்கின்றன
ரோஜாக்கள்

உன் டைரியின்
ஒவ்வொரு பக்கத்திலும்
புதுவண்ணம் தீட்டவே
தூரிகை
தூக்கி வருகின்றன
பட்டாம்பூச்சிகள்

ஒவ்வொரு பக்கத்திலும்
கவிதை எழுதிட
உன் தேவியின்
நினைவு விரல்கள் இதோ…

உன்
வெற்றி வாழ்க்கையைச்
சேமித்து வைத்துப் பெருமை கொள்வதில்
இந்தப்
புதிய டைரிக்குக்
கொஞ்சம் கனம் அதிகம்தான் !