விவேக் குடும்பத்துக்கு ஆறுதல் கூறிய நடிகர் விஜய்

ஜார்ஜியாவிலிருந்து சென்னைக்குத் திரும்பியுள்ள நடிகர் விஜய், விவேக்கின் வீட்டுக்குச் சென்று அவருடைய குடும்பத்துக்கு ஆறுதல் தெரிவித்துள்ளார்.

மாரடைப்பால் சென்னையிலுள்ள தனியார் மருத்துவமனையில் அனுமதிக்கப்பட்ட நடிகர் விவேக், சிகிச்சை பலனின்றி உயிரிழந்தார். விவேக்கின் மறைவுக்குத் திரையுலகினரும் ரசிகர்களும் நேரில் வந்து அஞ்சலி செலுத்தினார்கள். விவேக்கின் உடலுக்கு மக்கள் ஏராளமாகத் திரண்டு கண்ணீர் மல்க அஞ்சலி செலுத்தினார்கள். மேட்டுக்குப்பம் மின்மயானத்தில் விவேக் உடல் காவல்துறை மரியாதையுடன் தகனம் செய்யப்பட்டது. 

இந்நிலையில் நெல்சன் இயக்கத்தில் நடித்து வரும் நடிகர் விஜய், படப்பிடிப்புக்காக ஜார்ஜியா சென்றிருந்தார். இந்நிலையில் ஜார்ஜியாவிலிருந்து திரும்பிய விஜய், இன்று காலை விவேக்கின் இல்லத்துக்குச் சென்று அவருடைய குடும்பத்தினருக்கு ஆறுதல் தெரிவித்தார். இத்தகவலை விஜய்யின் செய்தித் தொடர்பாளர் தெரிவித்துள்ளார்.