மம்மூட்டி - மோகன்லால் படத்தின் பெயர்!

நடிகர்கள் மம்மூட்டி, மோகன்லால் இணைந்து நடிக்கும் படத்தின் பெயர் அறிவிக்கப்பட்டுள்ளது.

மலையாளத்தில் முன்னனி நடிகர்களாக இருக்கும் மம்மூட்டி, மோகன்லால் இருவரும் தயாரிப்பு நிறுவனங்களையும் நடத்தி வருகின்றனர். தங்களின் படங்களை இவர்களே தயாரித்தும் வெளியிடுகின்றனர்.

இறுதியாக, மம்மூட்டி நடித்த பசூக்கா அவருக்கு வெற்றியைக் கொடுத்தது. அதேபோல், மோகன்லாலுக்கு துடரும் மிகப்பெரிய வெற்றிப்படமாக அமைந்தது. அதனைத் தொடர்ந்து, ஹருதயப்பூர்வம் படத்திற்காகக் காத்திருக்கிறார்.

தற்போது, இவர்கள் இருவரும் இணைந்து ‘டேக் ஆஃப்’, ‘மாலிக்’ படங்களின் இயக்குநர் மகேஷ் நாராயண் இயக்கத்தில் நடித்து வருகின்றனர். இதில் குஞ்சக்கோ போபன், ஃபஹத் ஃபாசில், நயன் தாரா உள்ளிட்டோரும் நடிக்கின்றனர்.

படத்தின் படப்பிடிப்பு இலங்கையில் விறுவிறுப்பாக நடைபெற்று வருகிறது. ஏற்கனவே, முதல்கட்ட படப்பிடிப்பு இலங்கையில் முடிந்திருந்தது.

இந்த நிலையில், இலங்கையில் நேர்காணல் ஒன்றில் பேசிய மோகன்லால், ”நானும் மம்மூட்டியும் இணைந்து நடிக்கும் படத்தின் படப்பிடிப்பிற்காக இலங்கையில் இருக்கிறோம். மிகப்பெரிய படமாக இது உருவாகி வருகிறது. காரணம், ஃபஹத் ஃபாசில், குஞ்சக்கோ போபன் உள்ளிட்ட நட்சத்திர நடிகர்களும் இதில் இணைந்துள்ளனர். படத்திற்கு பேட்ரியாட் (patriot - தேசபக்தன்) எனப் பெயரிட்டுள்ளோம்” என்றதுடன் “இலங்கை சினிமா இயக்குநர்கள் என்னை நடிக்க அழைத்தால் கண்டிப்பாக நடித்துக்கொடுப்பேன்.” எனத் தெரிவித்துள்ளார்.

மம்மூட்டியும் மோகன்லாலும் மலையாள சினிமாவில் வசூல் நட்சத்திரங்களாக இருக்கும் சூழலில் இப்படம் வணிக ரீதியாக பெரிய சாதனைகளைச் செய்யலாம் என கணிக்கப்பட்டுள்ளது.