ஹரியாணாவில் தண்ணீரைப் பாய்ச்சி விவசாயிகள் கலைப்பு: பிரியங்கா காந்தி கண்டனம்

விவசாயிகளின் பிரச்னைகளை கேட்பதற்குப் பதிலாக, அவர்களைக் கலைக்க பாஜக அரசு குளிர்காலத்தில் நீர் பீரங்கிகளை பயன்படுத்துகிறது என காங்கிரஸ் பொதுச் செயலாளர் பிரியங்கா காந்தி கண்டனம் தெரிவித்துள்ளார். 

விவசாயிகளுக்கான உற்பத்தி, வா்த்தகம், வணிகம் மேம்படுத்தல் மற்றும் வசதி ஏற்படுத்தித் தருதல் மசோதா, விவசாயிகளுக்கான விலை உறுதிப்பாடு ஒப்பந்தம் (அதிகாரமளித்தல் மற்றும் பாதுகாப்பு) மசோதா, விவசாய சேவைகள் மசோதா மற்றும் அத்தியாவசிய பொருள்கள் சட்டத் திருத்த மசோதா ஆகிய 3 மசோதாக்கள் நாடாளுமன்ற அவைகளில் நிறைவேற்றப்பட்டு சட்ட வடிவம் பெற்றுள்ளன. 

தொடர்ந்து வேளாண் சட்டங்களுக்கு எதிராக காங்கிரஸ் உள்ளிட்ட எதிர்க்கட்சிகள், விவசாய மற்றும் சமூக நல அமைப்புகள் பல்வேறு இடங்களில் போராட்டம் நடத்தி வருகின்றன. 

இந்நிலையில் வேளாண் சட்டங்களுக்கு எதிராக விவசாயிகள் ஹரியாணா வழியாக தில்லி நோக்கி பேரணியில் ஈடுபட்டுள்ளனர். தொடர்ந்து அம்பாலாவில் விவசாயிகள் தடுத்து நிறுத்தப்பட்டனர். மேலும் காவல்துறையினர் நீரை பாய்ச்சி விவசாயிகளை கலைத்தனர். 

இதுகுறித்து காங்கிரஸ் கட்சியின் பொதுச் செயலாளர் பிரியங்கா காந்தி, 

விவசாயப் பொருள்களுக்கான ஆதரவு விலையை பறித்த சட்டங்களுக்கு எதிராகப் போராடும் விவசாயிகளின் பிரச்னைகளை காது கொடுத்து கேட்பதற்குப் பதிலாக, பாஜக அரசு குளிர்காலத்தில் அவர்களைக் கலைக்க நீர் பீரங்கிகளை பயன்படுத்துகிறது.

பெரு நிறுவன முதலாளிகளுக்கு வங்கிக் கடன்கள் அனைத்தையும் தள்ளுபடி செய்யும் பாஜக அரசு விவசாயிகளிடமிருந்து அனைத்தையும் பறிக்கிறது என்று பதிவிட்டுள்ளார்.