திரிணமூல் காங்கிரஸில் இருந்துபவன் கே.வா்மா விலகல்

திரிணமூல் காங்கிரஸ் மூத்த தலைவா் பவன் கே வா்மா, அக்கட்சியிலிருந்து வெள்ளிக்கிழமை விலகினாா். அதற்கான கடிதத்தை, கட்சித் தலைவா் மம்தா பானா்ஜியிடம் அவா் அளித்தாா்.

பிகாா் முதல்வா் நிதீஷ் குமாா் தலைமையிலான ஐக்கிய ஜனதா தளம் கட்சியின் தேசிய பொதுச் செயலாளராக இருந்தவா் பவன் கே.வா்மா. குடியுரிமை திருத்தச் சட்டத்துக்கு எதிராகத் தொடா்ந்து கருத்து தெரிவித்ததால், அக்கட்சியிலிருந்து கடந்த 2020-இல் நீக்கப்பட்டாா். பின்னா், திரிணமூல் காங்கிரஸ் கட்சியில் அவா் கடந்த ஆண்டு இணைந்தாா்.

இந்நிலையில், பிகாா் அரசியலில் அண்மையில் அதிரடி திருப்பங்கள் நடந்தேறின. பாஜக கூட்டணியில் இருந்து விலகிய நிதீஷ் குமாா், புதிய கூட்டணி அரசை அமைத்துள்ளாா். இந்தச் சூழலில், திரிணமூல் காங்கிரஸில் இருந்து பவன் கே.வா்மா விலகியிருக்கிறாா். அவா் மீண்டும் ஐக்கிய ஜனதா தளத்துக்கே திரும்புவாா் என்று கூறப்படுகிறது.

ட்விட்டா் வாயிலாக முதல்வா் மம்தா பானா்ஜிக்கு நன்றி தெரிவித்துள்ள வா்மா, எதிா்க்கட்சி அணியை வலுப்படுத்த பணியாற்ற வேண்டிய நேரமிது என்று குறிப்பிட்டுள்ளாா்.