இலங்கை அதிபருடன் பிரதமா் மோடி இன்று சந்திப்பு: முக்கிய ஒப்பந்தங்கள் கையெழுத்து

இலங்கை அதிபர் அநுர குமார திசாநாயக - பிரதமர் நரேந்திர மோடி இடையே சனிக்கிழமை (ஏப்.5) நடைபெறவுள்ள பேச்சுவார்த்தையைத் தொடர்ந்து இரு தரப்பிலும் பாதுகாப்பு, எரிசக்தி பாதுகாப்பு மற்றும் எண்மமயமாக்கல் உள்ளிட்ட துறைகளில் ஒத்துழைப்பை அதிகரிப்பது உள்ளிட்ட முக்கிய முடிவுகள் எடுக்கப்படவுள்ளன.

இந்தச் சந்திப்பின்போது இரு தரப்பும் முக்கிய ஒப்பந்தங்களில் கையொப்பமிடவும் திட்டமிட்டுள்ளன.

'பிம்ஸ்டெக்' எனப்படும் பல்துறை தொழில்நுட்ப மற்றும் பொருளாதார ஒத்துழைப்புக்கான வங்காள விரிகுடா முயற்சி உச்சிமாநாட்டில் கலந்து கொள்வதற்காக பாங்காக் சென்ற பிரதமர் மோடி, அங்கு தனது பயணத்தை முடித்துக்கொண்டு, வெள்ளிக்கிழமை இரவு இலங்கை தலைநகர் கொழும்புக்கு வருகை தந்தார். அவரை பண்டாரநாயக சர்வதேச விமான நிலையத்தில் இலங்கை வெளிவிவகாரத் துறை அமைச்சர் விஜித ஹேரத் தலைமையிலான உயர்நிலைக் குழு வரவேற்றது. தலைநகரின் தாஜ் சமுத்ரா நட்சத்திர விடுதியில் பிரதமர் மோடி தங்கியுள்ளார். அவரை வரவேற்கும் விதமாக கொழும்பின் முக்கிய வீதிகளில் மிகப்பெரிய அளவில் விளம்பர பேனர்கள் நிறுவப்பட்டுள்ளன.

இலங்கை அதிபராக அநுர குமார திசாநாயக பதவியேற்ற பிறகு அந்நாட்டுக்கு வருகை தந்த முதலாவது வெளிநாட்டுத் தலைவர் இந்தியப் பிரதமர் மோடி. கடைசியாக அவர் 2019-இல் இலங்கைக்கு வருகை தந்தார்.

'பிரதமர் மோடியின் கொழும்பு வருகை, இலங்கைக்கும் இந்தியாவுக்கும் இடையிலான நீண்டகால உறவுகளை வலுப்படுத்துவதை நோக்கமாகக் கொண்டுள்ளது' என்று இலங்கை அதிபரின் செயலகம் செய்திக்குறிப்பு வாயிலாகத் தெரிவித்துள்ளது.

இந்தியா - இலங்கை இடையிலான நூற்றாண்டு நட்புறவின் வளமான எதிர்காலத்துக்கான உறுதிப்பாடு என்ற கருவை உறுதிப்படுத்தும் வகையில் இந்தப் பயணம் திட்டமிடப்பட்டுள்ளது. கொழும்பு பேச்சுவார்த்தையின்போது கையொப்பமாகும் என எதிர்பார்க்கப்படும் ஏழு முக்கிய ஒப்பந்தங்களில் பாதுகாப்பு ஒத்துழைப்பு, எண்மமயமாக்கல், பாதுகாப்பு மற்றும் சுகாதார பராமரிப்பு, இலங்கைக்கான இந்தியாவின் மறுசீரமைக்கப்பட்ட கடனுதவி ஆகியவை முக்கியமானவை. இது தவிர மேலும் மூன்று ஒப்பந்தங்களும் கையொப்பமாகலாம் என எதிர்பார்க்கப்படுகிறது.

இரண்டு ஆண்டுகளுக்கு முன்பு இலங்கை மிகப் பெரிய பொருளாதார நெருக்கடியில் சிக்கியபோது, 450 கோடி அமெரிக்க டாலர்கள் மதிப்பிலான நிதியுவியை அந்நாட்டுக்கு இந்தியா வழங்கியது. இந்நிலையில், மோடியும் திசா நாயகவும் சனிக்கிழமை நடத்தும் பேச்சுவார்த்தை, இந்தியா வழங்கும் கடன் மறுசீரமைப்பு மற்றும் நாணயப் பரிமாற்றத்தில் இலங்கைக்கு இந்தியா உதவுவதை எளிதாக்கும் என்று இந்திய தூதரக வட்டாரங்கள் தெரிவித்தன.

இந்தியா - இலங்கை இடையிலான பாதுகாப்பு ஒத்துழைப்பு ஒப்பந்தம் இரு தரப்புக்கும் ஒரு பெரிய முன்னேற்றமாகக் கருதப்படுகிறது. 35 ஆண்டுகளுக்கு முன்பு இலங்கையில் உள்நாட்டுப் போரை கட்டுப்படுத்துவதற்காக முகாமிட்டிருந்த இந்திய அமைதி காப்புப் படையை (ஐபிகேஎஃப்) இத்தகைய ஓர் ஒப்பந்தம் மூலமே இந்தியா திரும்பப் பெற்றுக் கொண்டது குறிப்பிடத்தக்கது.

கொழும்பில் உள்ள இந்திய தூதர் சந்தோஷ் ஜா, இலங்கைக்கு இந்தியா அளித்த உதவி போன்று, உலகின் வேறு எந்த நாட்டுக்கும் இதுவரை வழங்கப்பட்டதில்லை என்று கூறினார். "தற்போது செயல்பாட்டில் உள்ள நீட்டிக்கப்பட்ட நிதி வசதியை இலங்கைக்கு வழங்க முடிவு செய்வதற்கு சர்வதேச செலாவணி நிதியத்துக்கு நிதி உத்தரவாதங்களை வழங்கிய முதல் நாடு இந்தியா' என்றும் அவர் தெரிவித்தார்.

'இரு நாடுகளுக்கும் இடையிலான பரஸ்பர வரலாறு, புவியியல் மற்றும் கலாசார உறவுகள் அடிப்படையில் முக்கியமானவை. இரு தரப்புக்கும் ஒரு பகிரப்பட்ட எதிர்காலம் உள்ளது என்ற புரிதலை இரு நாடுகளும் கொண்டுள்ளன' என்று அவர் கூறினார்.

காணொலித் திட்டம்: சனிக்கிழமை (ஏப்.5) காலை கொழும்பில் இருந்தவாறு காணொலிக் காட்சி வாயிலாக திருகோணமலையின் சம்பூரில் இந்தியா உதவியுடன் செயல்படுத்தப்படும் சூரியசக்தி மின்னுற்பத்தி நிலையத் திட்டம், தம்புள்ள என்ற இடத்தில் 5,000 மெட்ரிக் டன் வெப்பநிலை மற்றும் ஈரப்பதத்தைக் கட்டுப்படுத்தக்கூடிய குளிர்பதன வசதித் திட்டம், இலங்கை முழுவதும் உள்ள சுமார் 5,000 மத வழிபாட்டுத் தலங்களின் மேற்கூரைகளில் சூரிய மின் தகடுகளை நிறுவும் திட்டம் ஆகியவை இரு நாட்டுத் தலைவர்கள் முன்னிலையில் நாட்டுக்கு அர்ப்பணிக்கப்படுகின்றன.

இந்தப் பயணத்தின்போது வடகிழக்கு, மலையகத் தமிழர்கள் மற்றும் அரசியல் தலைவர்கள் பிரதமர் மோடியை சந்தித்துப் பேசும் வகையில் அவரது பயணத் திட்டம் தயாரிக்கப்பட்டுள்ளதாக தூதரக வட்டாரங்கள் தெரிவித்தன.

அனுராதபுரத்தில் தனது இலங்கைப் பயணத்தை ஞாயிறு (ஏப்.6) முற்பகலில் நிறைவு செய்யும் பிரதமர் மோடி, ஹெலிகாப்டர் மூலம் அனுராதபுரத்தில் இருந்து தமிழகத்தின் மண்டபம் கடலோர காவல் படை ஹெலிகாப்டர் தளத்துக்கு செல்கிறார். பாம்பன் புதிய ரயில் பாலம் திறப்பு விழாவில் கலந்து கொள்ளும் வகையில் அவரது பயணத் திட்டம் தயாரிக்கப்பட்டுள்ளது.

தலைநகரில் தொடர் நிகழ்ச்சிகள்...

தலைநகர் கொழும்பில் உள்ள சுதந்திர சதுக்கத்தில் பிரதமர் மோடிக்கு சனிக்கிழமை (ஏப்.5) காலை 9.10 மணியளவில் சம்பிரதாய முறையில் வரவேற்பு அளிக்கப்படும். இதையடுத்து, இலங்கை அதிபரின் செயலகத்தில் இலங்கை அதிபர் அநுர குமார திசாநாயக இந்தியப் பிரதமர் மோடியுடன் பேச்சுவார்த்தை நடத்துகிறார். தொடர்ந்து இரு தரப்பு அமைச்சர்கள், அதிகாரிகள் நிலையிலான உயர்நிலைக் குழு பிரதிநிதிகளின் பேச்சுவார்த்தை இரு நாட்டுத் தலைவர்கள் முன்னிலையில் நடைபெறும். அதன் முடிவில் கையொப்பமாகும் ஒப்பந்தங்கள் பரிமாறிக் கொள்ளப்படும்.

இதையடுத்து, இந்தியா உதவியுடன் செயல்படுத்தப்படும் திட்டங்களின் தொடக்க நிகழ்ச்சி, காணொலிக் காட்சி வாயிலாக திட்டங்கள் அர்ப்பணிக்கப்படும் நிகழ்வு நடைபெறும். இதன் முடிவில் நண்பகல் 12 மணியளவில் இரு நாட்டுத் தலைவர்களும் கூட்டாக செய்தியாளர்களைச் சந்திக்கவுள்ளனர்.

இதன் பின்னர் தாஜ் சமுத்ரா நட்சத்திர தங்கும் விடுதியில் பிரதமர் நரேந்திர மோடியை இலங்கைப் பிரதமர், வெளியுறவு அமைச்சர் மற்றும் அரசியல் தலைவர்கள் மரியாதை நிமித்தமாக சந்தித்துப் பேசவுள்ளனர்.

இந்திய அமைதிகாப்புப் படையின் நினைவிடத்துக்கு மாலை செல்லும் பிரதமர், உயிர்த் தியாகம் செய்த இந்திய வீரர்களுக்கு மலரஞ்சலி செலுத்துகிறார். இதையடுத்து, அதிபர் மாளிகையில் பிரதமர் மோடிக்கு இரவு விருந்தளிக்கப்படுகிறது.

முன்னதாக, இரு தலைவர்களும் வரவேற்பு மற்றும் ஏற்புரை ஆற்றுவார்கள்.

கொழும்பில் இருந்து ஹெலிகாப்டர் மூலம் ஞாயிற்றுக்கிழமை காலையில் (ஏப்.6) புறப்பட்டு அனுராதபுரத்தில் உள்ள விமானப்படை தளத்துக்கு பிரதமர் மோடியும் அதிபர் அநுர குமார திசாநாயகவும் செல்கின்றனர். அங்கிருந்து சாலை மார்க்கமாக ஜெய ஸ்ரீ மஹாபோதி ஆலயத்துக்குச் சென்று இரு தலைவர்களும் வழிபடுகின்றனர்.

பின்னர், காலை 10 மணியளவில் அனுராதபுரம் ரயில் நிலையத்தில் புதிதாக மேம்படுத்தப்பட்டுள்ள மஹவ - ஓமந்தை ரயில் பாதை திறப்பு மற்றும் மஹவ - அனுராதபுரம் ரயில் சமிக்ஞை வசதியை பிரதமர் மோடி தொடங்கி வைக்கிறார். இந்த இரண்டும் இந்திய நிதியுதவியுடன் செயல்படுத்தப்படும் திட்டங்களாகும்.