தொடர்ச்சியாக சண்டை செய்ய விரும்புகிறோம்..! ரோஹித் பேட்டி!

எந்த சூழ்நிலையிலும் நாங்கள் எளிதாக விட்டுக்கொடுக்க மாட்டோம் என பெருமிதமாகப் பேசியுள்ளார் இந்திய அணியின் கேப்டன் ரோஹித் சர்மா.

பிரிஸ்பேனில் நடைபெற்றுவந்த 3ஆவது டெஸ்ட் மழையின் காரணமாக சமனில் முடிவடந்தது. இதனால், பார்டர் கவாஸ்கர் தொடர் 1-1 என சமநிலையில் உள்ளது.

முதல் இன்னிங்ஸில் ஆஸி. 445 ரன்கள் குவிக்க இந்திய அணி முதலில் விக்கெட்டுகளை இழந்து தடுமாறியது. பின்னர் ராகுல், ஜடேஜா அற்புதமாக விளையாடினார்கள்.

ஃபாலோ ஆன் ஆகாமல் இந்திய அணி சிறபாக விளையாடியது குறித்து செய்தியாளர் சந்திப்பில் இந்திய அணியின் கேப்டன் ரோஹித் சர்மா பேசியதாவது:

தொடர்ச்சியாக சண்டை செய்ய விரும்புகிறோம்

எந்த சூழ்நிலையிலும் நாங்கள் எளிதாக விட்டுக்கொடுக்க மாட்டோம். இந்த மனநிலையில்தான் நாங்கள் சமீபகாலமாக விளையாடி வருகிறோம். நாங்கள் தொடர்ச்சியாக சண்டை செய்ய விரும்புகிறோம்.

இரண்டாவது இன்னிங்ஸில் பந்துவீசும்போதும் நாங்கள் இதே தீவிரத்தன்மையுடனே பந்து வீசினோம். 60-70 ரன்களில் ஆஸி.யை ஆட்டமிழக்க செய்தோம். ஏனெனில் அவர்கள் ரன்கள் குவிப்பார் என எங்களுக்குத் தெரியும்.

அது எங்களுக்கு வாய்ப்பினை அளித்தது. அதனால் எங்களுக்கு விக்கெட்டுகளும் கிடைத்தன. 50 ஓவர்களில் 270 ரன்களை சேஸ் செய்ய போதுமான நேரம் எங்களுக்கு கிடைக்கவில்லை.

எதிரணிக்கும் அழுத்தம்

எதிரணிக்கும் அழுத்தம் இருந்தது. எதிரணிக்கு அழுத்தம் தராதவரை அவர்கள் அந்த நேரத்தில் எப்படி விளையாடுவார்கள் என்பது தெரியாது. கடைசியாக நாங்கள் இங்கு 320-330 ரன்களை துரத்தி வெற்றி பெற்றது அவர்களுக்கு நினைவிருக்கும்.

நாங்கள் அந்த இலக்குகளை சேஸ் செய்ய முடியுமென அவர்களுக்கு தெரியும். இன்று நடந்தது மெல்போர்னில் நடக்கும் போட்டிக்கு தன்னம்பிக்கையை அளித்துள்ளது.

எப்படியானாலும் நாங்கள் முதலிலிருந்துதான் தொடங்க வேண்டும். அங்கு பிட்ச் வேறுமாதிரி இருக்கும். இங்கு பந்து திரும்புவதுபோல் அங்கும் திரும்பாது. அதற்கேற்றார்போல் நாங்கள் திட்டமிட வேண்டும் என்றார்.