இந்தாண்டு டி20 போட்டியில் எய்டன் மார்க்ரம் மோசமாக விளையாடி வருகிறார். டி20 உலகக் கோப்பையிலும் சொதப்பலாகவே விளையாடினார்.
கடந்த 16 போட்டிகளில் 212 ரன்கள் மட்டுமே எடுத்துள்ளார். 15.14 சராசரியுடன் 116.48 ஸ்டிரைக் ரேட்டுடன் விளையாடியுள்ளார். இதில், அதிகபட்ச ரன் 46-ஆக இருக்கிறது.
4 போட்டிகள் கொண்ட டி20 தொடரில் இந்தியாவுடன் விளையாடி வருகிறார். தற்போது 1-1 என சமநிலையில் உள்ளது.
முன்னாள் தெ.ஆ. வீரர் கிப்ஸ், “நடப்பு டி20 தொடரில் இந்திய அணி 2 போட்டிகள் முன்னிலையில் இருப்பார்கள் என நினைத்தேன். ஆனால், கடைசி 2 போட்டிகள் அதிக ரன்கள் கொண்ட போட்டியாக மாறியுள்ளது. யார் வேண்டுமானாலும் தொடரை வெல்வார்கள் போலிருக்கிறது” என்றார்.
ரசிகர் ஒருவர் அடுத்த 2 போட்டிகளில் தெ.ஆ. டாப் 6 பேட்டர்கள் குறித்து கேள்வி கேட்டதற்கு கிப்ஸ் , “ மார்க்ரம் குளிர்பானங்களை எடுத்து செல்லலாம்” என வெளிப்படையாகக் கூறினார்.
கடந்த 2 போட்டிகளில் மார்க்ரம் 11 ரன்கள் எடுத்தது குறிப்பிடத்தக்கது.
24 போட்டிகளில் 583 ரன்கள் மட்டுமே எடுத்துள்ளார். சராசரி 23ஆக இருக்கிறது. மீதமுள்ள போட்டிகளிலாவது மார்க்ரம் மீண்டு வருவாரா என தெ.ஆ. ரசிகர்கள் காத்திருக்கிறார்கள்.
அடுத்து 2 டெஸ்ட் போட்டியில் இலங்கை உடன் தெ.ஆ. அணி விளையாடவிருக்கிறது. நவ.27இல் இந்தப் போட்டிகள் தொடங்குகின்றன.
தற்போது இந்திய அணி பேட்டிங் செய்து வருகிறது. 8.4 ஓவரில் 107/2 ரன்கள் எடுத்துள்ளது. சாம்சன் டக்கவுட் ஆக, அபிஷேக் சர்மா 50 ரன்களுக்கு ஆட்டமிழந்தார்கள்.