கிளாசன் அரைசதம் விளாசல்; கொல்கத்தா நைட் ரைடர்ஸுக்கு 227 ரன்கள் இலக்கு!

கொல்கத்தா நைட் ரைடர்ஸுக்கு எதிரான போட்டியில் முதலில் விளையாடிய சன்ரைசர்ஸ் ஹைதராபாத் அணி 226 ரன்கள் எடுத்துள்ளது.

ஐபிஎல் தொடரில் கொல்கத்தாவின் ஈடன் கார்டன்ஸ் திடலில் நடைபெற்று வரும் இன்றைய ஆட்டத்தில் கொல்கத்தா நைட் ரைடர்ஸ் மற்றும் சன்ரைசர்ஸ் ஹைதராபாத் அணிகள் விளையாடி வருகின்றன.

இந்தப் போட்டியில் டாஸ் வென்ற கொல்கத்தா நைட் ரைடர்ஸ் அணி பந்துவீச்சைத் தேர்வு செய்ய, சன்ரைசர்ஸ் ஹைதராபாத் முதலில் விளையாடியது.

கிளாசன் அரைசதம்; கொல்கத்தாவுக்கு 227 ரன்கள் இலக்கு!

முதலில் விளையாடிய சன்ரைசர்ஸ் ஹைதராபாத் அணி நிர்ணயிக்கப்பட்ட 20 ஓவர்களின் முடிவில் 8 விக்கெட்டுகளை இழந்து 226 ரன்கள் எடுத்துள்ளது.

தொடக்க ஆட்டக்காரர்களான டிராவிஸ் ஹெட் மற்றும் அபிஷேக் சர்மா அணிக்கு அதிரடியான தொடக்கத்தைத் தந்தனர். முதல் விக்கெட்டுக்கு இந்த இணை 82 ரன்கள் எடுத்தது. அதிரடியாக விளையாடிய டிராவிஸ் ஹெட் 21 பந்துகளில் 46 ரன்கள் எடுத்து ஆட்டமிழந்தார். அதில் 6 பவுண்டரிகள் மற்றும் 3 சிக்ஸர்கள் அடங்கும். கேப்டன் இஷான் கிஷன் 14 ரன்களில் ஆட்டமிழந்தார்.

மற்றொரு தொடக்க ஆட்டக்காரரான அபிஷேக் சர்மா 21 பந்துகளில் 48 ரன்கள் எடுத்து ஆட்டமிழந்தார். அதில் 4 பவுண்டரிகள் மற்றும் 4 சிக்ஸர்கள் அடங்கும். அதன் பின், கிளாசன் மற்றும் நிதீஷ் குமார் ரெட்டி ஜோடி சேர்ந்தனர். இந்த இணை அணியின் ஸ்கோரை உயர்த்தியது.

அதிரடியாக விளையாடிய கிளாசன் அரைசதம் விளாசி அசத்தினார். அவர் 35 பந்துகளில் 52 ரன்கள் எடுத்தார். அதில் 4 பவுண்டரிகள் மற்றும் ஒரு சிக்ஸர் அடங்கும். நிதீஷ் குமார் ரெட்டி 24 பந்துகளில் 39 ரன்கள் எடுத்தார். அதில் 4 பவுண்டரிகள், ஒரு சிக்ஸர் அடங்கும்.

கொல்கத்தா நைட் ரைடர்ஸ் தரப்பில் பிளெஸ்ஸிங் முசராபானி 4 விக்கெட்டுகளைக் கைப்பற்றினார். வைபவ் அரோரா 2 விக்கெட்டுகளையும், கார்த்திக் தியாகி மற்றும் அனுகுல் ராய் தலா ஒரு விக்கெட்டினையும் கைப்பற்றினர்.

227 ரன்கள் எடுத்தால் வெற்றி என்ற இலக்கை நோக்கி கொல்கத்தா நைட் ரைடர்ஸ் அணி விளையாடி வருகிறது.