உலக பாட்மிண்டன் போட்டி: காலிறுதியில் அஸ்வினி-சத்விக் இணை, சிந்து, சாய்னா, சாய் பிரணீத்

உலக பாட்மிண்டன் சாம்பியன் போட்டி காலிறுதிக்கு இரட்டையர் பிரிவில் அஸ்வினி-சத்விக் இணை, ஒற்றையர் பிரிவில் சிந்து, சாய்னா, சாய் பிரணீத் ஆகியோர் முன்னேறியுள்ளனர். 
சீனாவின் நான்ஜிங் நகரில் உலக பாட்மிண்டன் சாம்பியன் போட்டிகள் நடந்து வருகின்றன. இந்நிலையில் வியாழக்கிழமை நாக் அவுட் சுற்று ஆட்டங்கள் நடைபெற்றன. மகளிர் ஒற்றையர் ஆட்டத்தில் இந்தியாவின் சாய்னா நெவால் 21-16, 21-19 என்ற நேர் செட்களில் முன்னாள் சாம்பியன் தாய்லாந்து ரட்சினோக் இந்தனானை வீழ்த்தி காலிறுதிக்கு முன்னேறினார். அவர் காலிறுதியில் ஒலிம்பிக் சாம்பியன் ஸ்பெயினின் கரோலினா மரினை சந்திக்கிறார்.
மற்றொரு ஆட்டத்தில் நட்சத்திர வீராங்கனை பி.வி.சிந்து 21-10, 21-18 என்ற நேர் செட்களில் தென்கொரியாவின் சுங் ஜி ஹியுனை வீழ்த்தி காலிறுதிக்கு முன்னேறினார். காலிறுதியில் அவர் ஜப்பானின் நவோமி ஒஹுராவை எதிர்கொள்கிறார்.
ஆடவர் ஒற்றையர் பிரிவு ஆட்டத்தில் இந்திய வீரர் சாய் பிரணீத் 21-13, 21-11 என்ற நேர் செட்களில் டென்மார்க்கின் விட்டிங்கஸை வீழ்த்தி காலிறுதிக்கு முன்னேறினார். அதே நேரத்தில் மற்றொரு நட்சத்திர வீரர் ஸ்ரீகாந்த் 18-21, 18-21 என நேர் செட்களில் மலேசியாவின் டேரன் லியுவிடம் தோல்வியுற்று வெளியேறினார்.
கலப்பு இரட்டையர் பிரிவில் இந்தியாவின் அஸ்வினி பொன்னப்பா-சத்விக் ரங்கிரெட்டி இணை 20-22, 21-14, 21-6 என்ற செட் கணக்கில் 7-ஆம் நிலை இணையான மலேசியாவின் ஜோ சூன் ஹுவாட்-ஷெவன் ஜெமியை வீழ்த்தி காலிறுதிக்கு முன்னேறியது.