யு.எஸ். ஓபன் போட்டியிலிருந்து நடால் விலகல்!

இந்த வருட யு.எஸ். ஓபன் டென்னிஸ் போட்டியிலிருந்து விலகுவதாக பிரபல வீரர் நடால் அறிவித்துள்ளார்.

உலகையே அச்சுறுத்தி வரும் கரோனா நோய் தொற்றின் தாக்கம் காரணமாக டோக்கியோ ஒலிம்பிக்ஸ் போட்டி அடுத்த ஆண்டுக்கு ஒத்திவைக்கப்பட்டுள்ளது. இதுதவிர, அந்தந்த நாடுகளில் நடைபெற இருந்த பல்வேறு விளையாட்டுப் போட்டிகளும் ரத்து செய்யப்பட்டுள்ளன. இதனிடையே, விம்பிள்டன் போட்டி இந்த ஆண்டு வரும் ஜூன் 29 முதல் - ஜூலை 12-ஆம் தேதி வரை நடைபெறுவதாக இருந்தது. எனினும், கரோனாவை கட்டுப்படுத்த உலக நாடுகள் போராடி வரும் நிலையில் போட்டியை நடத்துவது தொடா்பாக கேள்வி எழுந்தது. இதையடுத்து இந்த வருட விம்பிள்டன் போட்டியை ரத்து செய்வதென முடிவெடுக்கப்பட்டது. மே 24- ஜூன் 7 தேதிகளில் நடைபெறவதாக இருந்த பிரெஞ்சு ஓபன் போட்டி செப்டம்பா் மாதத்துக்கு ஒத்திவைக்கப்பட்டுள்ளது. 

இந்த வருட யு.எஸ். ஓபன் போட்டி காலி அரங்கில் ஆகஸ்ட் 31 முதல் செப்டம்பர் 13 வரை நடைபெறவுள்ளது. இப்போட்டியைக் காண ரசிகர்களுக்கு அனுமதி கிடையாது.

கரோனா அச்சுறுத்தல் காரணமாக யு.எஸ். ஓபன் டென்னிஸ் போட்டியிலிருந்து விலகுவதாக உலகின் நெ.1 வீராங்கனை ஆஷ்லி பார்டி சமீபத்தில் அறிவித்தார். இந்நிலையில் பிரபல வீரர் நடாலும் இந்த வருட யு.எஸ். ஓபன் டென்னிஸ் போட்டியிலிருந்து விலகியுள்ளார். இதுகுறித்து அவர் கூறியதாவது:

உலகம் முழுக்க கரோனா நோயாளிகளின் எண்ணிக்கை அதிகமாகியுள்ளது. சூழல் புதிராக உள்ளது. கரோனாவை நம்மால் இன்னும் கட்டுப்படுத்த முடியவில்லை. இதனால் மிகவும் யோசனைக்குப் பிறகு இந்த வருட யு.எஸ். ஓபன் போட்டியிலிருந்து விலகுவதாக அறிவிக்கிறேன்.

மிகுந்த சிரமத்துக்கு மத்தியில் போட்டியை நடத்தும் போட்டி அமைப்பாளர்களுக்கு என்னுடைய மரியாதையைத் தெரிவித்துக்கொள்கிறேன். இந்த முடிவை விருப்பமில்லாமல் தான் எடுத்துள்ளேன். மனது என்ன சொல்கிறதோ அதன்படி பயணம் செய்ய வேண்டம் என முடிவெடுத்து இந்த அறிவிப்பை வெளியிடுகிறேன் என்று கூறியுள்ளார்.