கவுன்டி கிரிக்கெட்: 6 விக்கெட்டுகள் எடுத்து அசத்திய அஸ்வின் (விடியோ)

2-வது இன்னிங்ஸில் அற்புதமாகப் பந்துவீசி சோமர்செட் அணியை 69 ரன்களுக்குள் சுருட்டினார்...

Updated On :15 ஜூலை 2021, 5:10 am

இங்கிலாந்து தொடருக்கான பயிற்சியாக சர்ரே அணியில் இடம்பெற்று கவுன்டி கிரிக்கெட் போட்டியில் விளையாடினார் சுழற்பந்து வீச்சாளர் அஸ்வின்.

உலக டெஸ்ட் சாம்பியன்ஷிப் இறுதி ஆட்டத்தில் இந்திய அணியை நியூசிலாந்து 8 விக்கெட்டுகள் வித்தியாசத்தில் வென்றது. இதனால் டெஸ்ட் உலக சாம்பியன் ஆனது நியூசிலாந்து அணி. உலக டெஸ்ட் சாம்பியன்ஷிப் போட்டியில் அதிக விக்கெட்டுகள் எடுத்த வீரர் என்கிற பெருமையை இந்தியாவின் அஸ்வின் பெற்றார். 14 ஆட்டங்களில் 71 விக்கெட்டுகளை எடுத்தார்.

இங்கிலாந்து டெஸ்ட் தொடருக்குத் தயாராவதற்காக கவுன்டி கிரிக்கெட்டில் விளையாடியுள்ளார் அஸ்வின். சர்ரே அணியில் இடம்பெற்ற அஸ்வின், ஓவல் மைதானத்தில் நடைபெற்ற சோமர்செட் அணிக்கு எதிரான ஆட்டத்தில் முதல் நாளில் 28 ஓவர்கள் வீசி 70 ரன்கள் கொடுத்து 1 விக்கெட் எடுத்தார். காயமடைந்த நியூசி. வீரர் கைல் ஜேமிசனுக்குப் பதிலாக அஸ்வின் இடம்பெற்றார்.

சோமர்செட் அணி தனது முதல் இன்னிங்ஸில் 148.5 ஓவர்களில் 429 ரன்கள் எடுத்தது. அஸ்வின் 43 ஓவர்கள் வீசி 99 ரன்கள் கொடுத்து 1 விக்கெட் எடுத்தார். அதிக விக்கெட் எடுக்காமல் போனாலும் 43 ஓவர்கள் வீசியதால் டெஸ்ட் தொடருக்கான நல்ல பயிற்சி அஸ்வினுக்குக் கிடைத்தது.

இந்நிலையில் 2-வது இன்னிங்ஸில் அற்புதமாகப் பந்துவீசி சோமர்செட் அணியை 69 ரன்களுக்குள் சுருட்டினார். அஸ்வினுக்கு 6 விக்கெட்டுகள் கிடைத்தன. 2-வது இன்னிங்ஸில் சர்ரே அணி, 4 விக்கெட் இழப்புக்கு 106 ரன்கள் எடுத்து ஆட்டத்தை டிரா செய்தது.

இந்தியா - இங்கிலாந்து அணிகளுக்கு இடையிலான டெஸ்ட் தொடர் ஆகஸ்ட் 4-ல் தொடங்குகிறது.

4-ம் நாள் ஆட்டத்தின் முழு விடியோ