ஆஸி. அணியின் முதல் ஆட்டத்தில் ஸ்டீவ் ஸ்மித்துக்கு இடமில்லை!

டி20 உலகக் கோப்பைப் போட்டியில் ஆஸ்திரேலிய அணியின் முதல் ஆட்டத்தில் பிரபல பேட்டர் ஸ்டீவ் ஸ்மித் இடம்பெற வாய்ப்பில்லை என கிரிக்கெட் ஆஸ்திரேலியாவின் தேர்வுக்குழுத் தலைவர் ஜார்ஜ் பெய்லி கூறியுள்ளார்.

அக்டோபர் 16 முதல் நவம்பர் 13 வரை 2022 டி20 உலகக் கோப்பைப் போட்டி ஆஸ்திரேலியாவில் நடைபெறுகிறது. 

மொத்தமாக 45 ஆட்டங்கள் அடிலெய்ட், பிரிஸ்பேன், கீலாங், ஹோபர்ட், மெல்போர்ன், பெர்த், சிட்னி நகரங்களில் நடைபெறவுள்ளன. நவம்பர் 9, 10 தேதிகளில் அரையிறுதி ஆட்டங்கள் சிட்னி, அடிலெய்டில் நடைபெறவுள்ளன. இறுதிச்சுற்று ஆட்டம் மெல்போர்ன் மைதானத்தில் நடைபெறுகிறது. 

டி20 உலகக் கோப்பைப் போட்டியின் பிரதான சுற்றுக்கு (சூப்பர் 12) ஆஸ்திரேலியா, இந்தியா, நியூசிலாந்து, ஆப்கானிஸ்தான், வங்கதேசம், இங்கிலாந்து, பாகிஸ்தான், தென்னாப்பிரிக்கா ஆகிய 8 நாடுகளும் நேரடியாகத் தகுதி பெற்றுள்ளன. மீதமுள்ள 4 அணிகள் முதல் சுற்றில் போட்டிட்டு அதன் வழியாக சூப்பர் 12 சுற்றுக்குத் தேர்வாகவுள்ளன.

சூப்பர் 12 சுற்றின் முதல் ஆட்டத்தில் அக்டோபர் 22 அன்று சிட்னியில் ஆஸ்திரேலியா - நியூசிலாந்து அணிகளும் பெர்த்தில் இங்கிலாந்து - ஆப்கானிஸ்தான் அணிகளும் அக்டோபர் 23 அன்று மெல்போர்னில் இந்தியாவும் பாகிஸ்தானும் மோதவுள்ளன. 

இந்நிலையில் நியூசிலாந்துக்கு எதிரான முதல் ஆட்டத்தில் ஸ்டீவ் ஸ்மித் விளையாட மாட்டார் எனத் தெரிகிறது. இதுகுறித்து கிரிக்கெட் ஆஸ்திரேலியாவின் தேர்வுக்குழுத் தலைவர் ஜார்ஜ் பெய்லி கூறியதாவது:

இந்த உலகக் கோப்பையில் அணியில் உள்ள 15 பேரும் பங்களிக்கவுள்ளார்கள். ஆனால் முதல் ஆட்டத்தில் விளையாடும் 11 பேரில் ஸ்டீவ் ஸ்மித்தும் இருப்பார் என நான் நினைக்கவில்லை. ஆனால் அடுத்து வரும் ஆட்டங்களில் அவருடைய பங்களிப்பு அணிக்கு உதவும். டேவிட் வார்னர் முதல் ஆட்டத்தில் விளையாடுவார் என்றார். 

இலங்கை - நெதர்லாந்து ஆட்டத்தில் நடுவர் அளித்த தவறான தீர்ப்பு!

டி20 உலகக் கோப்பை: ஆஸ்திரேலிய வீரர் விலகல்!

ஓவர்களை விரைவாக வீசி முடிக்க ஆஸி. அணி மேற்கொள்ளும் புதிய உத்தி!