டி20 உலகக் கோப்பைத் தொடருக்கான விளம்பரத் தூதராக பிரபல தடகள வீரர் உசைன் போல்ட் நியமிக்கப்பட்டுள்ளார்.
உலகக் கோப்பைத் தொடர் வருகிற ஜூன் 1 முதல் அமெரிக்கா மற்றும் மேற்கிந்தியத் தீவுகளில் தொடங்கவுள்ள நிலையில், உசைன் போல்ட்டை விளம்பரத் தூதராக ஐசிசி நியமித்துள்ளது முக்கியத்துவம் பெறுகிறது.
100 மீட்டர், 200 மீட்டர் தடகளப்போட்டிகளில் உசைன் போல்ட் கடந்த 2008 ஆம் ஆண்டு ஒலிம்பிக் போட்டியின்போது வரலாறு படைத்தார். கிரிக்கெட் மீது அதிக ஆர்வம் கொண்டவரான அவரை டி20 உலகக் கோப்பைத் தொடருக்கான விளம்பரத் தூதராக ஐசிசி நியமித்துள்ளது.
இது தொடர்பாக ஐசிசி முதன்மை நிர்வாக அதிகாரி (சிஇஓ) கூறியதாவது: உசைன் போல்ட் உலகம் முழுவதும் அறியப்பட்ட விளையாட்டு வீரர். டி20 உலகக் கோப்பைத் தொடருக்கான விளம்பரத் தூதராக அவரை நியமிப்பதில் நாங்கள் மிகுந்த மகிழ்ச்சியடைகிறோம். கிரிக்கெட் மீதான அவரது அதீத ஆர்வம் அனைவரும் அறிந்ததே. கிரிக்கெட்டை நேசிப்பவரான அவர் விளம்பரத் தூதர் பொறுப்புக்கு மிகவும் பொருத்தமானவராக இருப்பார் என்றார்.
விளம்பரத் தூதராக நியமிக்கப்பட்டது குறித்து உசைன் போல்ட் கூறியதாவது: எதிர்வரும் டி20 உலகக் கோப்பைத் தொடருக்கான விளம்பரத் தூதராக நியமிக்கப்பட்டுள்ளது மிகுந்த மகிழ்ச்சியளிக்கிறது. கரீபியன் தீவுகளில் கிரிக்கெட் என்பது வாழ்க்கையின் ஒரு பகுதியாக பார்க்கப்படும். கிரிக்கெட்டுக்கென எனது இதயத்தில் எப்போதும் சிறப்பான இடம் உண்டு என்றார்.
தினமணி செய்திமடலைப் பெற... Newsletter
தினமணி'யை வாட்ஸ்ஆப் சேனலில் பின்தொடர... WhatsApp
தினமணியைத் தொடர: Facebook, Twitter, Instagram, Youtube, Telegram, Threads
உடனுக்குடன் செய்திகளை அறிய தினமணி App பதிவிறக்கம் செய்யவும்.
