ஓபிஎஸ் சகோதரர் ராஜா அதிமுகவிலிருந்து நீக்கம்

வி.கே.சசிகலாவை சந்தித்துப் பேசிய அதிமுக ஒருங்கிணைப்பாளர் ஓ.பன்னீர்செல்வத்தின் சகோதரர் ஓ.ராஜா, அதிமுகவில் இருந்து நீக்கப்பட்டுள்ளார். 

தென் மாவட்டங்களில் சுற்றுப்பயணம் மேற்கொண்ட சசிகலா வெள்ளிக்கிழமை பிற்பகல் திருச்செந்தூர் ரயில் நிலையம் அருகில் உள்ள தனியார் விடுதிக்கு வந்து தங்கினார். அங்கு வந்த ஓபிஎஸ் சகோதரர் ராஜா சசிகலாவை சந்தித்தார். 

இந்நிலையில், கட்சியின் கொள்கைகளுக்கு முரணாக செயல்பட்டதால் அதிமுகவின் அடிப்படை உறுப்பினர் உள்பட அனைத்துப் பதவிகளில் இருந்தும் ஓ.ராஜா நீக்கப்படுவதாக அதிமுக தலைமை அறிவித்துள்ளது. 

மேலும் தேனி மாவட்ட இலக்கிய அணிச் செயலாளர் எஸ். முருகேசன், தேனி மாவட்ட மீனவர் பிரிவுச் செயலாளர் வைகை கருப்புஜி ஆகியோரும் கட்சியில் இருந்து நீக்கப்பட்டுள்ளனர். 

அதிமுகவில் சசிகலா, தினகரன் ஆகியோரை சேர்க்க வேண்டும் என்று ஒரு தரப்பினர் கூறிவந்த நிலையில் தேனியில் ஓபிஎஸ் தலைமையில் நடைபெற்ற கூட்டத்தில் அதுதொடர்பான தீர்மானம் நிறைவேற்றப்பட்டு முடிவெடுக்கப்படாமல் உள்ளது குறிப்பிடத்தக்கது.