தலைமைக் காவலா் உயிரிழப்பு

சென்னையில் பணிபுரிந்த தலைமைக் காவலா் மருத்துவ விடுப்பில் சொந்த ஊரான வத்திராயிருப்புக்கு வந்த நிலையில் திங்கள்கிழமை உயிரிழந்தாா்.

ஸ்ரீவில்லிபுத்தூா் அருகேயுள்ள வத்திராயிருப்பு பகுதியைச் சோ்ந்தவா் சந்தோஷ்குமாா் (30). இவா் சென்னை சைதாப்பேட்டை காவல் நிலையத்தில் தலைமைக் காவலராக பணிபுரிந்து வந்தாா். இவருக்கு திருமணமாகி ஒரு மகன் உள்ளாா். மனைவியைப் பிரிந்து தனியாக வசித்து வந்தாா். கடந்த ஒரு வாரத்துக்கு முன் சந்தோஷ்குமாா் சென்னையில் இரு சக்கர வாகனத்தில் சென்ற போது விபத்து ஏற்பட்டு மாா்பில் கம்பி குத்தியது. இதனால், கடந்த 30-ஆம் தேதிமருத்துவ விடுப்பில் வத்திராயிருப்புக்கு வந்தாா்.

இந்த நிலையில், திங்கள்கிழமை மாலை வீட்டிலிருந்து வெளியே சென்ற சந்தோஷ்குமாா் வத்திராயிருப்பு புதிய பேருந்து நிலைய வளாகத்தில் உள்ள தண்ணீா் தொட்டி அருகே வாயில் நுரை பொங்கிய நிலையில் இறந்து கிடந்தாா்.

தகவல் அறிந்து வந்த வத்திராயிருப்பு போலீஸாா் அவரது உடலை மீட்டு கூறாய்வுக்காக வத்திராயிருப்பு அரசு மருத்துவமனைக்கு அனுப்பி வைத்தனா். இதுகுறித்து வத்திராயிருப்பு போலீஸாா் வழக்குப் பதிவு செய்து விசாரித்து வருகின்றனா். இதுகுறித்து போலீஸாா் கூறுகையில், சந்தோஷ்குமாருக்கு வலிப்பு ஏற்பட்டதில் கீழே விழுந்ததில் தலையில் காயம் ஏற்பட்டு உயிரிழந்து இருக்கலாம். உடல்கூறாய்வு அறிக்கைக்கு பிறகு இறப்புக்கான முழுமையான காரணம் தெரியவரும் என்றனா்.