ஐரோப்பாவில் உள்ள நாடுகள் பலவும் பிரான்ஸில் பரவி வரும் காட்டுத் தீயினை அணைக்க அந்த நாட்டை நோக்கி அணிவகுக்கத் தொடங்கியுள்ளன.
ஐரோப்பாவின் பல நாடுகளிலும் அனல் அலை வீசுவதால் காட்டுத் தீ அதிக அளவில் பரவி வருகிறது. போர்ச்சுகலில் அதிக அளவில் பைன் காடுகள் உள்ளன. தொடர்ந்து கட்டுக்கடங்காமல் பரவி வரும் காட்டுத் தீயினால் பைன் காடுகள் அதிக அளவில் எரிந்து நாசமாகி வருகின்றன.
பிரான்ஸ் நாட்டின் காட்டுத் தீ பரவல் மற்ற ஐரோப்பிய நாடுகளைக் காட்டிலும் அதிக அளவில் உள்ளது.
பிரான்ஸ் நாட்டின் தீயணைப்பு வீரர்கள் காட்டுத் தீயினை அணைக்க கடுமையாக போராடி வருகின்றனர். காற்றின் வேகம் குறைவாக உள்ளதால் தீயினை அணைப்பது சற்று எளிதாக இருந்தாலும், தொடர்ச்சியாக தீ பரவும் வேகம் குறையவில்லை.
இதுவரை காட்டுத் தீயினால் 74 சதுர கிலோ மீட்டருக்கும் அதிகமாக காடுகள் பாதிக்கப்பட்டுள்ளன. மேலும், வேகமாகப் பரவி வரும் காட்டுத் தீயினால் ஆயிரத்திற்கும் அதிகமானோர் அவர்கள் குடியிருப்புகளில் இருந்து வெளியேற்றப்பட்டு பத்திரமான இடங்களில் தங்க வைக்கப்பட்டுள்ளனர்.
ஏற்கனவே பிரான்ஸ் நாட்டைச் சேர்ந்த ஆயிரத்திற்கும் அதிகமானோர் காட்டுத் தீயினை அணைக்கும் பணியில் ஈடுபட்டுள்ள நிலையில், 360க்கும் அதிகமான தீயணைப்பு வீரர்கள் ஜெர்மனி, ரோமானியா, போலாந்து, ஆஸ்திரியா ஆகிய நாடுகளில் இருந்து பிரான்ஸ் நாட்டிற்கு வந்து காட்டுத் தீயினை அணைக்கும் பணியில் ஈடுபட்டுள்ளனர். அதே போல கிரீஸ் நாட்டிலிருந்து தீயினை அணைக்கும் பணிக்காக விமானங்கள் பிரான்ஸ் நாட்டிற்கு வழங்கப்பட்டுள்ளன. ஸ்வீடன் சார்பிலும் இரண்டு தீயினை அணைக்கும் வாகங்கள் ஈடுபட்டுள்ளன.
தினமணி செய்திமடலைப் பெற... Newsletter
தினமணி'யை வாட்ஸ்ஆப் சேனலில் பின்தொடர... WhatsApp
தினமணியைத் தொடர: Facebook, Twitter, Instagram, Youtube, Telegram, Threads
உடனுக்குடன் செய்திகளை அறிய தினமணி App பதிவிறக்கம் செய்யவும்.