விண்வெளியில் இருந்தும் அமெரிக்காவைத் தாக்க முடியாத கோல்டன் டோம்! டிரம்ப் அறிவிப்பு!

உலகின் எந்தப் பகுதியில் இருந்து அமெரிக்காவைத் தாக்கினாலும் இடைமறித்து அழிக்கக் கூடிய கோல்டன் டோம் குறித்த அறிவிப்பை அந்நாட்டு அதிபர் டொனால்ட் டிரம்ப் செவ்வாய்க்கிழமை அறிவித்தார்.

ஏவுகணைத் தாக்குதலில் இருந்து தற்காத்துக் கொள்ளும் ஏராளமான அதிநவீன வான் பாதுகாப்பு அம்சங்கள் அமெரிக்காவிடம் ஏற்கெனவே உள்ளன. இடைமறித்து நடுவானிலேயே தாக்கி அழிக்கும் தளவாடங்களும் இருக்கின்றன.

இந்த நிலையில், அதிநவீன உலகில் வான் பாதுகாப்பை மேலும் வலுப்படுத்தும் நோக்கில் ’கோல்டன் டோம்’ என்ற வான் பாதுகாப்பு திட்டத்தை டிரம்ப் வெளியிட்டுள்ளார்.

வெள்ளை மாளிகையில் உள்ள ஓவல் அலுவலகத்தின் செவ்வாய்க்கிழமை செய்தியாளர்களை சந்தித்த டிரம்ப், 175 பில்லியன் அமெரிக்க டாலர் (இந்திய மதிப்பின்படி, கிட்டத்திட்ட ரூ. 15 லட்சம் கோடி) செலவில் கோல்டன் டோம் உருவாக்கப்படவுள்ளதாக தெரிவித்தார்.

இதற்கான வடிவமைப்பு இறுதியாகிவிட்டதாகவும், தனது பதவிக் காலம் முடிவதற்கு முன்னதாக (2029-க்குள்) இந்த கோல்டன் டோம் செயல்பாட்டுக்கு வரும் என்றும் தெரிவித்துள்ளார்.

முற்றிலும் அமெரிக்காவிலேயே வடிவமைக்கப்படவுள்ள இந்த கோல்டன் டோம் திட்டத்தை விண்வெளித் துறையின் துணைத் தலைவர் மைக்கேல் கட்லெயின் மேற்பார்வையிடவுள்ளார்.

கோல்டன் டோம் கட்டிமுடிக்கப்பட்ட பிறகு உலகின் எந்த மூலையில் இருந்து அமெரிக்காவைத் தாக்கினாலும், ஏன் விண்வெளியில் இருந்து தாக்கினாலும் இடைமறித்து அழிக்கக்கூடிய வல்லமையை அமெரிக்கா பெறும் எனத் தெரிவித்துள்ளார்.

கோல்டன் டோம் சிறப்பம்சங்கள்

• ஹமாஸ் படை தாக்குதல் நடத்தியபோது, இரும்பு டோமை பயன்படுத்தி இஸ்ரேல் தன்னைப் பாதுகாத்துக் கொண்டது, அதனடிப்படையில் நவீன தொழில்நுட்ப அம்சங்கங்களுடன் கோல்டன் டோமை கட்டமைக்க அமெரிக்கா முடிவெடுத்துள்ளது.

• இரும்பு டோம் குறுகிய தொலைவில் இருந்து குறைவான வேகத்தில் ஏவப்படும் ஏவுகணைகளை அழிக்கக்கூடிய வகையில் கட்டமைக்கப்பட்டுள்ள நிலையில், அதிலிருந்து கோல்டன் டோம் முற்றிலும் வேறுபட்டதாக அமைக்கப்படவுள்ளது.

• ரஷியா, சீனா போன்ற நாடுகள் வைத்திருக்கும் கண்டம்விட்டு கண்டம் பாயும் அதிநவீன பாலிஸ்டிக் மற்றும் ஹைப்பர்சோனிக் ஏவுகணைகளில் இருந்து தற்காத்துக் கொள்ளும் வகையில் அமைக்கப்படுகிறது.

• அமெரிக்காவைக் குறிவைத்து ஏவப்படும் அதிநவீன ஹைப்பர்சோனிக் ஏவுகணைகளை துல்லியமாகக் கண்டறிந்து, நடுவானிலேயே அழிப்பதற்காக கோல்டன் டோமை பல செயற்கைக்கோளுடன் இணைக்க திட்டமிட்டுள்ளனர்.

• இதன்மூலம், விண்வெளியில் இருந்து ஏவுகணை தாக்குதல் நடத்தினாலும் அதனை இடைமறித்து, கோல்டன் டோம் தாக்கி அழிக்கும்.

• அமெரிக்காவைவிட 400 மடங்கு நிலப்பரப்பில் சிறிய இஸ்ரேல், அதன் தட்டையான பாலை வனப்பகுதியை எளிதாக இரும்பு டோம் மூலம் தற்காத்து வருகின்றது.

• அமெரிக்கா தனது நிலப்பரப்புக்கு ஏற்றவாறு கோல்டன் டோமை அமைக்கும் என்று எதிர்பார்க்கப்படுகிறது.

இதையும் படிக்க : காஸாவினுள் போதுமான மனிதாபிமான உதவிகளை அனுமதியுங்கள்! போப் வலியுறுத்தல்!