அண்ணா பல்கலை. சம்பவம்: கைதானவா் சிறையில் அடைப்பு

சென்னை அண்ணா பல்கலைக்கழக மாணவி பாலியல் வன்கொடுமை வழக்கில் கைது செய்யப்பட்ட ஞானசேகரன், புழல் சிறையில் அடைக்கப்பட்டாா்.

கிண்டி அண்ணா பல்கலைக்கழக வளாகத்தில் கடந்த மாதம் 23-ஆம் தேதி மாணவி பாலியல் வன்கொடுமை செய்யப்பட்ட வழக்கில், கோட்டூரைச் சோ்ந்த ஞானசேகரன் கடந்த 25-ஆம் தேதி கைது செய்யப்பட்டாா்.

அவரிடம் வழக்குக்கான ஆதாரங்களைத் திரட்டும் வகையில் போலீஸாா் ரகசிய இடத்தில் வைத்து விசாரணை செய்தனா். அப்போது அவா் தப்பியோட முயன்றபோது, கீழே விழுந்து இடது காலும், இடது கையும் முறிந்ததாக போலீஸாா் தெரிவித்தனா்.

சிகிச்சைக்காக ராயப்பேட்டை அரசு மருத்துவமனையில் அனுமதிக்கப்பட்ட அவருக்கு கை, கால் முறிவுக்கு மாவுக்கட்டு போடப்பட்டது. இதைத் தொடா்ந்து அவா் சைதாப்பேட்டை நீதிமன்றத்தில் ஆஜா்படுத்தப்பட்டாா். நீதிமன்ற உத்தரவுப்படி ஸ்டான்லி அரசு மருத்துவமனையில் உள்ள கைதிகள் வாா்டில் அனுமதிக்கப்பட்டாா்.

மருத்துவமனை சிகிச்சையில் உடல்நிலை தேறியதால் ஞானசேகரனை சிறையில் அடைக்க அதிகாரிகள் முடிவு செய்தனா். இதன்படி, வியாழக்கிழமை மாலை ஞானசேகரன் பலத்த பாதுகாப்புடன் ஸ்டான்லி அரசு மருத்துவமனையில் இருந்து புழல் சிறைக்கு அழைத்துச் செல்லப்பட்டாா். அங்கு உடல் பரிசோதனைக்கு பின்னா் சிறை அறையில் அடைக்கப்பட்டாா்.