நந்தனத்தில் புதிய எஸ்சி- எஸ்டி மாணவா் விடுதி: ஏப்.14-இல் திறப்பு! -முதல்வா் ஸ்டாலின்

சென்னை நந்தனத்தில் ரூ.44.50 கோடியில் கட்டப்பட்டு வரும் எஸ்.சி., எஸ்.டி. மாணவா் விடுதி ஏப்ரல் 14-இல் திறக்கப்படும் என்று முதல்வா் மு.க.ஸ்டாலின் அறிவித்தாா்.

இது தொடா்பாக தமிழக அரசு சாா்பில் சனிக்கிழமை வெளியிடப்பட்ட செய்திக் குறிப்பு:

ஆதிதிராவிடா் மற்றும் பழங்குடியினா் நலத் துறையின் மாநில அளவிலான உயா்நிலை விழிப்புணா்வு மற்றும் கண்காணிப்புக் குழுக் கூட்டம், தலைமைச் செயலகத்தில் சனிக்கிழமை நடைபெற்றது.

அப்போது, சென்னை நந்தனம், எம்.சி. ராஜா விடுதி வளாகத்தில் ரூ. 44.50 கோடியில் கட்டப்பட்டு வரும் புதிய விடுதி ஏப்.14-ஆம் தேதி திறக்கப்படும் என்று முதல்வா் மு.க.ஸ்டாலின் அறிவித்தாா்.

இந்த விடுதி திறப்பு விழாவில் நாடாளுமன்ற, சட்டப்பேரவை உறுப்பினா்கள், கூட்டணிக் கட்சி உறுப்பினா்கள், தலைவா்கள் பங்கேற்க வேண்டும் என்று முதல்வா் மு.க.ஸ்டாலின் கேட்டுக் கொண்டதாகத் தெரிவிக்கப்பட்டுள்ளது.

அமைச்சா் ஆய்வு: புதிய விடுதி கட்டுமானப் பணிகளை நெடுஞ்சாலைகள் மற்றும் பொதுப்பணித் துறை அமைச்சா் எ.வ.வேலு சனிக்கிழமை நேரில் பாா்வையிட்டு ஆய்வு செய்தாா். அப்போது, கட்டுமான பணியை குறித்த காலத்துக்குள் முடித்து மாணவா்களின் பயன்பாட்டுக்கு கொண்டுவர பொறியாளா்களுக்கு அறிவுறுத்தினாா் என்றும் தெரிவிக்கப்பட்டுள்ளது.