உலக விதவைகள் தின விழிப்புணர்வுப் பேரணி

உலக விதவைகள் தினத்தையொட்டி உத்தரமேரூரில் விழிப்புணர்வுப் பேரணி நடைபெற்றது.
காஞ்சிபுரம் மாவட்டம் உத்திரமேரூரை அடுத்த வாடாநல்லூர் கிராமத்தைச் சேர்ந்த ஒருங்கிணைந்த அறக்கட்டளைகள் சார்பில் உலக விதவைகள் தின விழிப்புணர்வுப் பேரணி புதன்கிழமை நடைபெற்றது. பேரணியை, உறுதிமொழி ஆணையர், வழக்குரைஞர் கருணாநிதி தொடங்கி வைத்தார். 
இப்பேரணி, அம்பேத்கர் சிலை அருகே தொடங்கி, பஜார் வீதி, சந்நிதி தெரு உள்ளிட்ட முக்கிய வீதிகள் வழியாகச் சென்றது. அப்போது, விதவைப் பெண்களை ஒதுக்கி வைக்கக் கூடாது. மற்ற பெண்களைப் போல் அவர்களையும் சமமாக மதிக்க வேண்டும், அரசின் திட்டங்கள் அவர்களுக்கு விரைந்து கிடைத்திட நடவடிக்கை மேற்கொள்ள வேண்டும் உள்ளிட்ட பல்வேறு வாசகங்கள் எழுதப்பட்ட பதாகைகளை ஏந்தியவாறு விழிப்புணர்வு ஏற்படுத்தப்பட்டது. 
இப்பேரணியில், தொண்டு நிறுவன நிர்வாகிகள், ஸ்டெல்லா, தீப்தி, சத்தியசீலன், உத்தரமேரூர் சுற்றுவட்டாரப் பகுதிகளைச் சேர்ந்த விதவைத் தாய்மார்கள் மற்றும் பெண்கள் உள்ளிட்டோர் கலந்துகொண்டனர். நிறைவாக, உத்தரமேரூர் வட்டாட்சியரிடம் தங்களது கோரிக்கை மனுக்களை அளித்தனர்.