அரசு மருத்துவக் கல்லூரியில் ரத்த தான விழிப்புணர்வு

திருவண்ணாமலை அரசு மருத்துவக் கல்லூரி மருத்துவமனையில் திங்கள்கிழமை ரத்த தான விழிப்புணர்வு மனிதச் சங்கிலி நடைபெற்றது.
தமிழ்நாடு மாநில எய்ட்ஸ் தடுப்பு மற்றும் கட்டுப்பாட்டு பிரிவு சார்பில் உலக ரத்தக் கொடையாளர் தின விழா நடைபெற்றது. 
விழாவுக்கு, மருத்துவக் கல்லூரி முதல்வர் நடராஜன் தலைமை வகித்தார். துணை முதல்வர் ஷகில் அஹமது, மருத்துவமனை கண்காணிப்பாளர் குப்புராஜ் ஆகியோர் முன்னிலை வகித்தனர்.  மாவட்ட ஆட்சியர் கே.எஸ்.கந்தசாமி சிறப்பு அழைப்பாளராகக் கலந்து கொண்டு தொடர் ரத்த தானம் அளித்த கொடையாளர்களைப் பாராட்டி பாராட்டுச் சான்று வழங்கினார்.
தொடர்ந்து, ரத்த தான முகாம் நடைபெற்றது. மேலும், ரத்த தான விழிப்புணர்வு மனிதச் சங்கிலியும், ரத்த தான விழிப்புணர்வு உறுதிமொழியேற்பு நிகழ்ச்சியும் நடைபெற்றது. 
இதில், தமிழ்நாடு மாநில எய்ட்ஸ் தடுப்பு மற்றும் கட்டுப்பாட்டுப் பிரிவு மருத்துவர்கள், கல்லூரி துறைத் தலைவர்கள், பேராசிரியர்கள், மருத்துவ மாணவ-மாணவிகள் பலர் கலந்து  கொண்டனர்.