ஆகஸ்ட் 31ஆம் தேதி வரை 40 சதவீதம் மட்டுமே கல்விக் கட்டணம் வசூலிக்க வேண்டும்: ஆட்சியா்

 கோவை மாவட்டத்தில் உள்ள அனைத்து வகை சுயநிதிப் பள்ளிகளும் 2021 - 2022 ஆம் கல்வியாண்டில் ஆகஸ்ட் 31 ஆம் தேதி வரை 40 சதவீதம் கட்டணம் மட்டுமே வசூலிக்க வேண்டும் என மாவட்ட ஆட்சியா் ஜி.எஸ்.சமீரன் தெரிவித்துள்ளாா்.

இது குறித்து அவா் வெளியிட்டுள்ள செய்திக்குறிப்பு:

கரோனா தொற்று காரணமாக தமிழகத்தில் உள்ள அரசு, அரசு உதவி பெறும் மற்றும் தனியாா் பள்ளிகளில் நேரடி வகுப்புகள் நடைபெறவில்லை.

இந்நிலையில், 2021- 2022 கல்வியாண்டில், கோவை மாவட்டத்தில் உள்ள தனியாா் சுயநிதிப் பள்ளிகளில் கட்டணங்கள் அதிகமாக வசூலிப்பதாகவும் மாணவா்களின் பெற்றோரை அதிகக் கட்டணம் செலுத்த கட்டாயப்படுத்துவதாகவும் புகாா்கள் வருகின்றன.

இது தொடா்பாக 2020 -2021 ஆம் கல்வியாண்டில் கல்விக் கட்டணம் 31.08.2020 முடிய 40 சதவீதமும், அதனைத் தொடா்ந்து இரண்டாம் கட்டமாக 29.02.2021 முடிய 35 சதவீதம் என 75 சதவீதம் கல்விக் கட்டணம் மட்டும் வசூலித்துக் கொள்ள நீதிமன்றத்தால் இடைக்கால தீா்ப்பாணைகள் வழங்கப்பட்டுள்ளன.

சென்னை பள்ளிக் கல்வி ஆணையரின் செயல்முறைக் கடிதத்தில் 2021- 2022 ஆம் கல்வி ஆண்டுக்கு, தமிழகத்தில் உள்ள அனைத்து வகை தனியாா் பள்ளிகளில் 31.08.2021 முடிய 40 சதவீதம் கல்விக் கட்டணம் மட்டும் வசூலித்துக் கொள்ளவும், பின் நேரடி வகுப்புகள் தொடங்கப்பட்ட நாளில் இருந்து 2 மாதங்களுக்குள் 35 சதவீதம் வசூலித்துக் கொள்ளவும், மீதமுள்ள 25 சதவீதம் கல்விக் கட்டணம் குறித்து அப்போது உள்ள சூழ்நிலையைப் பொருத்து முடிவெடுக்கப்படும் எனவும் தெரிவிக்கப்பட்டுள்ளது.

எனவே, மாவட்டத்தில் உள்ள அனைத்து சுயநிதிப் பள்ளிகளும் 2021 - 2022 கல்வியாண்டில் 31.08.2021 முடிய 40 சதவீதம் கட்டணம் மட்டுமே வசூலிக்க வேண்டும். அரசால் நிா்ணயம் செய்யப்பட்டுள்ள கல்விக் கட்டணத்தை தவிா்த்து, காலணிகள், சீருடைகள், வாகனங்கள் போன்ற இதர கட்டணங்கள் ஏதும் வசூலித்தல் கூடாது என தெரிவிக்கப்பட்டுள்ளது.