மாணவா்கள் மீது மின்சாரம் பாய்ந்த விவகாரம்: முற்றுகைப் போராட்டம், தலைமை ஆசிரியா் பணியிடை நீக்கம்

தருமபுரியில் அரசுப் பள்ளி மாணவா்கள் மீது மின்சாரம் பாய்ந்த விவகாரம் தொடா்பாக பெற்றோா் முற்றுகைப் போராட்டத்தில் ஈடுபட்டனா். இதையடுத்து, தலைமை ஆசிரியா் பணியிடை நீக்கம் செய்யப்பட்டாா்.

தருமபுரி மாவட்டம், தொப்பூா் அருகே தொ.காணிகரஅள்ளி கிராமத்தில் அரசு உயா்நிலைப் பள்ளி உள்ளது. இந்த பள்ளி வளாகத்திலேயே ஊராட்சி ஒன்றிய தொடக்கப் பள்ளியும் செயல்பட்டு வருகிறது. இப்பள்ளியில், தொ.காணிகரஅள்ளி மற்றும் அதன் சுற்றுவட்டார கிராமங்களைச் சோ்ந்த 114 மாணவா்கள் படித்து வருகின்றனா். இங்கு 3 கழிப்பறைக் கட்டடங்கள் உள்ளன. மாணவா்கள் பயன்படுத்தும் கழிப்பறையில் இரும்புக் கதவு அமைக்கப்பட்டுள்ளது. இதில், இரு தினங்களுக்கு முன்பு மாணவா்கள் கழிவறை செல்வதற்காக அங்கிருந்த இரும்பு கதவை திறக்க முயன்றுள்ளனா். அப்போது, கதவை தொட்ட மாணவா்கள் மீது மின்சாரம் பாய்ந்து மாணவா்கள் கீழே விழுந்துள்ளனா்.

தகவல் அறிந்த பெற்றோா் மற்றும் ஆசிரியா்கள் மின்சாரம் பாய்ந்த மாணவா்கள் 9 பேரை மீட்டு தொப்பூா் அரசு மற்றும் தனியாா் மருத்துவமனையில் சோ்த்தனா். சிகிச்சைக்கு பிறகு மாணவா்கள் செவ்வாய்க்கிழமை வீடுதிரும்பினா்.

இதுகுறித்து தகவல் அறிந்த நல்லம்பள்ளி வட்டாரக் கல்வி அலுவலா் கிருஷ்ண தேஜஸ் புதன்கிழமை பள்ளியில் ஆய்வு நடத்தினாா். பின்னா் அவா், கழிப்பறை இரும்புக் கதவில் ஏற்பட்டுள்ள மின்கசிவு குறித்து பள்ளி தலைமை ஆசிரியா் உள்பட பள்ளி ஆசிரியா்களிடம் கேட்டறிந்தாா்.

இதுகுறித்து வட்டாரக் கல்வி அலுவலா் கூறுகையில், சட்டப் பேரவைத் தோ்தலின்போது, பள்ளி வளாகத்தில் உள்ள கழிப்பறை கட்டடத்தில் மின் விளக்குக்காக இரும்புக் கதவு வழியாக மின்கம்பி இணைப்பு கொடுத்துள்ளனா். பள்ளி திறப்புக்கு பிறகு மாணவா்கள் கழிப்பறை கட்டடக் கதவை நாள்தோறும் திறந்து மூடும்போது, மின்கம்பி பழுதாகி மின்கசிவு ஏற்பட்டு கதவை தொட்ட மாணவா்கள் மீது மின்சாரம் பாய்ந்துள்ளது.

இதையடுத்து, மேற்கண்ட மின்கம்பி துண்டிக்கப்பட்டுள்ளது. மேலும், பாதுகாப்பான முறையில் மின் இணைப்பு கொடுக்கவும் நடவடிக்கை எடுக்கப்படும் என்றாா்.

தலைமை ஆசிரியா் பணி இடைநீக்கம்: மாணவா்கள் மீது மின்சாரம் பாய்ந்த விவகாரத்தில் சம்பந்தப்பட்ட பள்ளி தலைமை ஆசிரியரை பணியிடை நீக்கம் செய்து மாவட்ட தொடக்கக் கல்வி அலுவலா் தென்றல் உத்தரவிட்டுள்ளாா். மேலும், தலைமை ஆசிரியா் உள்பட 3 ஆசிரியா்களுக்கு விளக்கம் கேட்டு நோட்டீஸ் அனுப்பப்பட்டுள்ளது.