மருமகன் தாக்கியதில் லாரி உரிமையாளர் சாவு

நாமக்கல் அன்பு நகரை சேர்ந்த தங்கவேல் (58), லாரி உரிமையாளர். இவரது மகள் ரூபிகா(28), கரூர் நீலிமங்கலம் பகுதியைச் சேர்ந்த சிவப்பிரகாசத்தை (29) காதலித்து திருமணம் செய்து கொண்டார். கடந்த 6 மாதங்களுக்கு முன் கணவருடன் ஏற்பட்ட கருத்து வேறுபாடு காரணமாக ரூபிகா தந்தை வீட்டுக்கு வந்து விட்டாராம்.
இதனிடையே, கடந்த 25 நாள்களுக்கு முன் ரூபிகாவுக்கு பெண் குழந்தை பிறந்தது. இதையடுத்து குழந்தையையும், மனைவியையும் பார்க்க சிவப்பிரகாசம் செவ்வாய்க்கிழமை காலை வந்தாராம். அப்போது ஏற்பட்ட தகராறில் சிவப்பிரகாசம், மாமனார் தங்கவேலுவை தாக்கியதாக கூறப்படுகிறது. 
இதில் நிலைதடுமாறி கீழே விழுந்த தங்கவேலு படுகாயமடைந்தார். நாமக்கல் தனியார் மருத்துவமனையில் சிகிச்சை பெற்று வந்த தங்கவேல் புதன்கிழமை காலை உயிரிழந்தார். இதையடுத்து, நாமக்கல் போலீஸார் சிவப்பிரகாசம் மீது கொலை வழக்குப் பதிவு செய்து, கைது செய்து விசாரணை நடத்தி வருகின்றனர்.