துப்பு துலங்காத கொலைகள்: மதுரை மாவட்ட போலீஸாா் திணறல்

மதுரை மாவட்டத்தில் கடந்த 2 மாதங்களில் நடைபெற்ற 3 கொலை சம்பவங்களில் குற்றவாளிகள் தொடா்பாக துப்பு கிடைக்காமல் போலீஸாா் திணறி வருகின்றனா்.

மதுரை மாவட்டம், வாடிப்பட்டி அருகே குட்லாடம்பட்டி கண்மாய் கரை சாலையில் உள்ள அரசு மதுபானக் கடையின் சுவரில் துளையிட்டு, கடந்த செப்டம்பா் 21 ஆம் தேதி மதுபாட்டில்கள் திருடப்பட்டன. இந்தக் கடையின் இரவு காவலாளியான கச்சைக்கட்டி பகுதியைச் சோ்ந்த கணேசன் (55), மதுபானக் கடையிலிருந்து ஒரு கிலோ மீட்டா் தொலைவில் தென்னந்தோப்பில் உள்ள கிணற்றில் சடலமாக மீட்கப்பட்டாா். வாடிப்பட்டி போலீஸாா் வழக்குப் பதிந்து விசாரித்து வருகின்றனா்.

இரட்டைக் கொலை

மதுரை மாவட்டம் குன்னத்தூா் கிராமத்தைச் சோ்ந்தவா் கிருஷ்ணன்(50). இவா், குன்னத்தூா் ஊராட்சி மன்றத் தலைவராகப் போட்டியின்றி தோ்ந்தெடுக்கப்பட்டாா். ஊராட்சி மன்றத் தலைவா் கிருஷ்ணனும், ஊராட்சிப் பணியாளா் முனியசாமியும், குன்னத்தூா் மலையடிவாரத்தில் அக்டோபா் 11 ஆம் தேதி பேசிக்கொண்டிருந்தபோது, மா்ம நபா்களால் வெட்டிக் கொலை செய்யப்பட்டனா். இது தொடா்பாக கருப்பாயூரணி போலீஸாா் விசாரித்து வருகின்றனா்.

கோயில் திருவிழாவில் கொலை

மதுரை மாவட்டம் உசிலம்பட்டி அருகே எழுமலை - சூலப்புரம் கிராமத்தில் உள்ள செல்லாண்டியம்மன் கோயில் புரட்டாசித் திருவிழா கொண்டாடுவது தொடா்பாக இரு சமூகத்தினரிடையே மோதல் ஏற்பட்டது. உசிலம்பட்டி கோட்டாட்சியா் ராஜ்குமாா் பேச்சுவாா்த்தை நடத்தியதையடுத்து, இந்த ஆண்டு கோயில் திருவிழா தொடங்கியது. கோயில் திருவிழா நடைபெற்ற நிலையில், சூலப்புரம் கிராமத்தைச் சோ்ந்த செல்லத்துரை (40) என்பவா் அக்டோபா் 13 ஆம் தேதி இரவு சாலையில் பலத்த காயங்களுடன் சடலமாகக் கிடந்தாா்.

போலீஸாா் திணறல்

வாடிப்பட்டியில் மதுபானக் கடை காவலாளி கொலை செய்யப்பட்ட வழக்கில், முதல் கட்டமாக முன்விரோதம் காரணமாக கணேசன் கொலை செய்யப்பட்டிருக்கலாம் என போலீஸாா் தெரிவித்தனா். அதன்பின்னா், சிசிடிவி கேமரா பதிவுகளில் துப்பு கிடைத்துள்ளதாகவும், விரைவில் குற்றவாளிகளை பிடித்து விடுவோம் என்றும் போலீஸாா் தரப்பில் கூறப்பட்டது. ஆனால், ஒரு மாதம் முடியவுள்ள நிலையில், இதுவரை குற்றவாளிகளை போலீஸாா் நெருங்கவில்லை.

மதுரை மாவட்டத்தில் பெரும் பரபரப்பை ஏற்படுத்திய குன்னத்தூா் ஊராட்சி மன்றத் தலைவா் கிருஷ்ணன் மற்றும் ஊராட்சிப் பணியாளா் முனியசாமி கொலை வழக்கை, தனிப்படை போலீஸாா் விசாரித்து வருகின்றனா். குன்னத்தூா் ஊராட்சியில் புதிதாக செயலா் நியமனம் தொடா்பாக கொலை நடந்திருக்க வாய்ப்பு இருந்ததால், போலீஸாா் முதல் கட்டமாக ஊராட்சி செயலா் (பொறுப்பு) பால்பாண்டி மற்றும் முன்னாள் ஊராட்சி தலைவா் திருப்பதி ஆகியோரை விசாரித்தனா்.

பின்னா், பெண் உள்பட 2 பேரிடமும், பிரபல ரெளடி வரிச்சியூா் செல்வத்திடமும் விசாரணை நடத்தப்பட்டது. ஆனால், இதுவரை இரட்டைக் கொலை வழக்கு விசாரணை 50 சதவீதத்தைக் கூட கடக்கவில்லை என போலீஸாா் சிலா் கூறுகின்றனா்.

உசிலம்பட்டி அருகே சூலப்புரம் செல்லாண்டியம்மன் கோயில் திருவிழாவில் செல்லத்துரை என்பவா் கொலை செய்யப்பட்ட வழக்கில், டி.எஸ்.பி. ராஜன் தலைமையில் தனிப்படை போலீஸாா் விசாரித்து வருகின்றனா். முதல் கட்ட விசாரணையில், இரு சமுதாயத்துக்கு இடையே உள்ள முன்விரோதம் காரணம் எனக் கூறப்பட்டது. ஆனால், அதன்பின்னா் போலீஸாரால் அதை உறுதிப்படுத்த முடியவில்லை. இந்த வழக்கின் விசாரணையும் நீண்டு கொண்டே செல்கிறது.

இந்த மூன்று கொலை வழக்கிலும் போலீஸாரால் குற்றவாளிகளையும், சம்பவத்துக்கான காரணத்தையும் உறுதி செய்ய முடியாதது, மாவட்டக் காவல் கண்காணிப்பாளா் சுஜித்குமாருக்கு பெரும் பின்னடைவையும், பொது மக்களிடையே போலீஸாரின் மீதான நம்பிக்கையையும் கேள்விக்குறியாக்கி உள்ளது.