கம்பத்தில் கேட்பாரற்று நின்ற காரை கைப்பற்றி போலீஸார் விசாரணை

கம்பத்தில்  கேட்பாரற்று நின்றிருந்த காரை போலீஸார் வியாழக்கிழமை கைப்பற்றி விசாரித்து வருகின்றனர்.
தேனி மாவட்டம் கம்பம் பிரதான சாலையில்  வ.உ.சி. மைதானம் தனியார் உணவக வாசலில் புதன்கிழமை காலையில் நிறுத்தப்பட்ட கேரள பதிவெண் கொண்ட கார், வியாழக்கிழமை வரை கவனிப்பாரற்று நின்றிருந்தது.  
இதுகுறித்து தகவலறிந்த கம்பம் தெற்கு காவல் நிலைய சார்பு ஆய்வாளர்கள் முனியம்மாள், திவான்மைதீன்  உணவக ஊழியர்களிடம் விசாரணை செய்தனர். புதன்கிழமை காலை சுமார் 25 வயதுடைய இளம்பெண்ணும், 30 வயது மதிக்கத்தக்க இளைஞரும் சாப்பிட்டு உள்ளனர். 
பின்னர் காரை நிறுத்திவிட்டு கடைக்கு செல்வதாக கூறிவிட்டு சென்றவர்கள் திரும்ப வரவில்லை என உணவக ஊழியர்கள் தெரிவித்தனர். அந்த கார் கதவு பூட்டப்படாமல் இருந்தது.  காரினுள் ஓட்டுநர் இருக்கை அருகே  பதிவு சான்றிதழ் இருந்தது. அதனை போலீஸார் கைப்பற்றி விசாரித்த போது, கார் கேரள மாநிலம் இடுக்கியைச் சேர்ந்த  அலெக்ஸ் சேவியர் என்பவருக்கு சொந்தமானது என தெரியவந்தது. 
செல்லிடப்பேசியில்  போலீஸார் தொடர்பு கொண்ட போது தனது காரை நண்பர் கடந்த இரண்டு நாள்களுக்கு முன்பு  எடுத்துச் சென்றதாகவும், அவரை தொடர்பு கொண்ட போது, செல்லிடப்பேசி அணைக்கப்பட்டிருப்பதாகவும் தெரிவித்தார். இதுகுறித்து கம்பம் தெற்கு போலீஸார் தொடர் விசாரணை நடத்தி வருகின்றனர்.