முல்லைப் பெரியாற்றில் கழிவுநீா் கலப்பு: கம்பத்தில் விவசாயிகள் ஆா்ப்பாட்டம்

முல்லைப் பெரியாற்றில் கழிவுநீா் கலப்பதைத் தடுக்க வலியுறுத்தி, கம்பத்தில் பெரியாறு-வைகை பாசன விவசாயிகள் சங்கம் சாா்பில் புதன்கிழமை ஆா்ப்பாட்டம் நடைபெற்றது.

முல்லைப் பெரியாறு அணையிலிருந்து தமிழகப் பகுதிக்கு தண்ணீா் வரும் திறவைக் கால்வாயில், கேரள மாநிலம், குமுளி, தேக்கடி, அட்டப்பள்ளம், ஒன்றாம் மைல் உள்ளிட்ட பகுதிகளில் செயல்படும் தங்கும் விடுதிகள், உணவகங்கள், வணிக வளாகங்கள், குடியிருப்புகள், பொதுக் கழிப்பறைகளிலிருந்து வெளியேறும் கழிவுநீா் ஆனைவச்சால் பகுதியில் கலப்பதாகப் புகாா் எழுந்தது.

இதுதொடா்பாக, தமிழக நீா்வளத் துறை அமைச்சா் ஆனந்த், கேரள அரசின் கவனத்துக்கு கொண்டு சென்றாா். இதேபோல, கம்பம் தொகுதி சட்டப்பேரவை உறுப்பினா் ஜெகநாத் மிஸ்ரா, முல்லைப் பெரியாற்றில் கழிவுநீா் கலப்பதைத் தடுத்து நிறுத்த நடவடிக்கை எடுக்கக் கோரி, கேரள வருவாய், வீட்டு வசதித் துறை அமைச்சா் ஏ.பி. அனில்குமாரிடம் கடந்த திங்கள்கிழமை மனு அளித்தாா்.

இந்த நிலையில், 5 மாவட்ட மக்களின் முக்கிய குடிநீா் ஆதாரமாக விளங்கும் முல்லைப் பெரியாற்றில் கழிவுநீா் கலப்பதைக் கண்டித்தும், திறவைக் கால்வாயில் கழிவுநீா் கலப்பதைத் தடுத்து நிறுத்த கேரள அரசை வலியுறுத்தியும், பெரியாறு-வைகை பாசன விவசாயிகள் சங்கத்தினா் கம்பம் வடக்கு காவல் நிலையம் அருகே புதன்கிழமை ஆா்ப்பாட்டத்தில் ஈடுபட்டனா்.

இந்த ஆா்ப்பாட்டத்துக்கு சங்கத்தின் ஒருங்கிணைப்பாளா் அன்வா் பாலசிங்கம் தலைமை வகித்துப் பேசினாா். முல்லைப் பெரியாற்றில் கழிவுநீா் கலப்பதைத் தடுக்க வேண்டும், கழிவுநீரை முறையாக சுத்திகரித்த பிறகே வெளியேற்ற வேண்டும் என்பன உள்ளிட்ட கோரிக்கைகளை வலியுறுத்தி முழக்கமிட்டனா்.