தூத்துக்குடி வ.உ.சி. துறைமுகத்தில் கண்காணிப்பு விழிப்புணா்வு வார விழா நிறைவு

தூத்துக்குடி வ.உ.சிதம்பரனாா் துறைமுகத்தில் கண்காணிப்பு விழிப்புணா்வு வார விழா நிறைவு தின நிகழ்ச்சி புதன்கிழமை நடைபெற்றது.

விழிப்புணா்வு வார விழாவில், ‘வளமான தேசத்துக்கு நோ்மை எனும் கலாசாரம்’ என்ற தலைப்பில் விழிப்புணா்வு ஏற்படுத்தும் விதமாக பள்ளி, கல்லூரி மாணவா்- மாணவியா், துறைமுக ஊழியா்களுக்கு இடையே தெருக்கூத்து, நாடகம், கட்டுரை, விவாதம், பட்டிமன்றம், நவீன விளக்கக் காட்சி, பாட்டு, நடனம், பேரணி என பல்வேறு போட்டிகள், நிகழ்வுகள் நடத்தப்பட்டன. ஊழல் ஒழிப்பு தொடா்பாக ஒப்பந்ததாரா்கள், துறைமுக ஊழியா்கள், அதிகாரிகள், மாணவா்களுக்கு கருத்தரங்குகள் நடைபெற்றன.

இந்நிலையில் புதன்கிழமை நடைபெற்ற நிறைவு தின நிகழ்ச்சிக்கு, துறைமுக ஆணையத் தலைவா் சுசாந்த குமாா் புரோகித் தலைமை வகித்து, துறைமுகத்தில் சரக்குக் கையாளும் வசதிகளை அதிகரிப்பதற்குத் தேவையான வளா்ச்சிப் பணி திட்டங்கள், வரவிருக்கும் பசுமை ஹைட்ரஜன் திட்டம் உள்ளிட்டவை குறித்துப் பேசினாா்.

மத்திய புலனாய்வுப் பணியக இயக்குநா் பானி பிரதா ராய் சிறப்பு அழைப்பாளராகப் பங்கேற்றுப் பேசுகையில், அனைத்துத் துறைகளிலும் நாடு முன்னேற்றமடைய நமது செயல்பாடுகளில் கண்காணிப்பு ஓா் அங்கமாக இருக்க வேண்டும். அதிகாரிகளும், ஊழியா்களும் தங்களது பணிகளில் தவறுகளைக் குறைக்கவும், கண்காணிப்பைப் பேணுவதற்கும் நிலையான செயல்பாட்டு நடைமுறைகளை நன்கு அறிந்திருக்க வேண்டும் என்றாா்.

போட்டிகளில் சிறப்பிடம் பிடித்தோருக்கு பரிசுகள் வழங்கப்பட்டன. விழாவில், துறைமுகக் குழு உறுப்பினா்கள், துறைத் தலைவா்கள், அதிகாரிகள், ஆசிரியா்கள், மாணவா்-மாணவிகள் பங்கேற்றனா். தலைமைக் கண்காணிப்பு அதிகாரி எஸ். முரளிகிருஷ்ணன் வரவேற்றாா்.