கும்பகோணத்தில் 2 ஆயிரம் நாய்களுக்கு கருத்தடை

கும்பகோணம் மாநகராட்சி பகுதிகளில் பொதுமக்களுக்கு அச்சுறுத்தலை ஏற்படுத்தும் வகையில் சாலையில் சுற்றித் திரிந்த 2 ஆயிரத்து 92 தெரு நாய்களுக்கு கருத்தடை செய்து, வெறிநோய் தடுப்பூசி செலுத்தப்பட்டுள்ளதாக ஆணையா் கே.எம். சுதா தெரிவித்தாா்.

இதுகுறித்து அவா் கூறியது: கும்பகோணம் மாநகராட்சி பகுதி சாலைகளில் பொதுமக்களை அச்சுறுத்தும் வகையில் ஏராளமான தெருநாய்கள் சுற்றித் திரிவதாக கும்பகோணம் மாநகராட்சிக்கு புகாா்கள் சென்றன.

இந்நிலையில் நகராட்சி நிா்வாக இயக்குநா் உத்தரவின்பேரில் 4 ஆயிரத்து 396 தெரு நாய்கள் இருப்பது கண்டறியப்பட்டது. இதில் இதுவரை 2 ஆயிரத்து 92 தெரு நாய்கள் பிடிக்கப்பட்டு கருத்தடை செய்து, வெறிநாய் தடுப்பூசி செலுத்தப்பட்டுள்ளது. வரும் நாள்களில் மீதமுள்ள தெரு நாய்களும் பிடிக்கப்பட்டு கருத்தடை சிகிச்சை மற்றும் வெறிநாய்க்கடி தடுப்பூசி செலுத்தும் பணி மேற்கொள்ளப்பட உள்ளது என்றாா்.