இலவச சீருடை வழங்கக் கோரி மாணவர்கள் போராட்டம்

புதுவையில் அரசுப் பள்ளி மாணவ, மாணவிகளுக்கு இலவச சீருடையை உடனடியாக வழங்கக் கோரி, இந்திய மாணவர் சங்கத்தினருடன் இணைந்து அந்தப் பள்ளி மாணவர்கள் புதன்கிழமை ஆர்ப்பாட்டத்தில் ஈடுபட்டனர்.
புதுவையில் அரசுப் பள்ளிகள் நிகழ் கல்வி ஆண்டு தொடங்கி 3 மாதங்கள் ஆகின்றன. ஆனால், இதுவரை மாணவர்களுக்கு வழங்கப்பட வேண்டிய சீருடைகள் வழங்கவில்லையாம். மேலும், இலவசப் பாட நூல்களும் வழங்கப்படவில்லையாம்.
எனவே, சீருடை, பாட நூல்கள் ஆகியவற்றை வழங்கக் கோரியும், கல்வி உதவித் தொகையை வழங்கக் கோரியும் புதுவை கலிதீர்த்தாள்குப்பத்தில் உள்ள கருணாநிதி அரசு மேல்நிலைப் பள்ளி மாணவர்கள் வகுப்புகளைப் புறக்கணித்தனர். அவர்கள் இந்திய மாணவர் சங்கத்தினருடன் சேர்ந்து தொடர்ந்து போராட்டத்தில் ஈடுபட்டனர்.  
இந்திய மாணவர் சங்கத்தின் பிரதேசத் தலைவர் ஜெயபிரகாஷ் தலைமை வகித்தார். 
போராட்டத்தில் இந்திய மாணவர் சங்க மத்திய குழு உறுப்பினர் ஆனந்த், பிரதேச துணைச் செயலர் செம்மலர்,  துணைத் தலைவர் செந்தமிழ், பிரதேச செயற்குழு உறுப்பினர்கள் வசந்த், ஸ்டீபன்ராஜ் ஆகியோர் பங்கேற்றனர்.
இதுகுறித்து தகவலறிந்த காவல் துறை அதிகாரிகள் மாணவர்களிடம் வந்து பேச்சவார்த்தை நடத்தி, கலைந்து போக வலியுறுத்தினர். இதைத் தொடர்ந்து போராட்டம் முடிவுக்கு வந்தது.