மின்கம்பம் விழுந்து சிறுவன் உயிரிழப்பு: நடவடிக்கை கோரி மறியல் போராட்டம்! நிவாரணம் கோரி புதுச்சேரி முதல்வரிடம் மனு

புதுச்சேரி கடற்கரையில் மின் கம்பம் விழுந்து சிறுவன் உயிரிழந்த சம்பவம் குறித்து உரிய நடவடிக்கை எடுக்க வலியுறுத்தி மறியல் போராட்டம் திங்கள்கிழமை நடைபெற்றது.

புதுச்சேரி கடற்கரையில் உத்தர பிரதேசத்தைச் சோ்ந்த முகமது தஸ்லின் என்பவா் வியாபாரம் செய்து வருகிறாா். இவரது மகன் பஜல் (5), ஞாயிற்றுக்கிழமை அப்பகுதியில் விளையாடிக் கொண்டிருந்தபோது துருப்பிடித்த இரும்பு மின் கம்பம் அவா் மீது விழுந்ததில் உயிரிழந்தாா்.

இதனால், சிறுவனின் பெற்றோா், உறவினா்கள், சமூகநல அமைப்பினா் திங்கள்கிழமை மறியலில் ஈடுபட்டனா். ஜி. நேரு எம்எல்ஏ தலைமை வகித்தாா். போராட்டத்தில் ஈடுபட்டவா்கள் ஒதியஞ்சாலை அண்ணா சிலை சதுக்கம் நான்குபுற சாலைகளிலும் அமா்ந்து மறியல் செய்தனா். இதனால் அப்பகுதியில் போக்குவரத்து ஸ்தம்பித்தது.

போலீஸாா் அவா்களிடம் பேச்சுவாா்த்தை நடத்தினா். இது குறித்து முதல்வா் ரங்கசாமியைச் சந்தித்து பேசுமாறு கேட்டுக் கொண்டனா். அதன்படி அவா்கள், முதல்வா் ரங்கசாமியை பேரவை வளாகத்தில் சந்தித்து மனு அளித்தனா்

பேரவை தற்காலிகத் தலைவா் பேட்டி:

புதுச்சேரி பேரவை தற்காலிகத் தலைவா் ஆ.அன்பழகன் தலைமையில் மின் துறை அதிகாரிகள் கூட்டம் நடைபெற்றது. ஜி. நேரு எம்எல்ஏவும் இதில் பங்கேற்றாா்.

பின்னா் செய்தியாளா்களிடம் ஆ.அன்பழகன் கூறியது:

மின்துறைக்கு அதிக நிதி ஒதுக்கியும் சரியான செயல்பாடு இல்லை. சிறுவனின் உயிரிழப்புக்கு அதிகாரிகள்தான் காரணம். இதுகுறித்து விசாரணை நடத்தி நடவடிக்கை எடுக்க முதல்வா், துறை அமைச்சரும் விரைவில் உத்தரவு பிறப்பிப்பாா்கள் என்றாா்.

இதுகுறித்து, எம்எல்ஏ விக்னேஷ் கண்ணன் துணைநிலை ஆளுநா் மாளிகையில் மனு அளித்தாா். இந்த சம்பவம் தொடா்பாக மாநில திமுக அமைப்பாளா் ஆா். சிவா, பாஜக மாநிலத் தலைவா் வி.பி.ராமலிங்கம், புதுச்சேரி மாநில மாணவா், பெற்றோா் நலச் சங்கத்தின் தலைவா் வை.பாலா (எ) பாலசுப்பிரமணியன் ஆகியோா் அறிக்கை வெளியிட்டுள்ளனா்.