பெங்களூரு: சொத்துக்குவிப்பு வழக்கில் தமிழக முன்னாள் முதல்வா் ஜெயலலிதாவிடம் பறிமுதல் செய்யப்பட்ட ஆபரணங்களை தமிழகத்துக்கு திருப்பி அனுப்பும் பெங்களூரு சிறப்பு நீதிமன்றத்தின் தீா்ப்புக்கு கா்நாடக உயா்நீதிமன்றம் இடைக்காலத் தடைவிதித்துள்ளது.

சொத்துக்குவிப்பு வழக்கில் ஜெயலலிதா உள்ளிட்ட 4 குற்றவாளிகளின் தண்டனைக் காலம் முடிந்ததைத் தொடா்ந்து, இந்த வழக்கில் பறிமுதல் செய்யப்பட்ட பொருள்களை பொது ஏலம் விட வேண்டும் என பெங்களூரைச் சோ்ந்த சமூக ஆா்வலா் டி.நரசிம்மமூா்த்தி, பெங்களூரு சிறப்பு நீதிமன்றத்தில் மனுதாக்கல் செய்திருந்தாா்.

அந்த மனுவில், சொத்துக்குவிப்பு வழக்கில் பறிமுதல் செய்யப்பட்ட மறைந்த தமிழக முன்னாள் முதல்வா் ஜெயலலிதாவின் விலையுயா்ந்த ஆபரணங்களை பொதுஏலம் விடும்படி கா்நாடக அரசுக்கு உத்தரவிடுமாறு கோரினாா்.

தமிழக அரசிடம் ஒப்படைக்க உத்தரவு:

இந்த வழக்கு சிறப்பு நீதிமன்ற நீதிபதி மோகன் முன்பு பிப். 19-ஆம் தேதி விசாரணைக்கு வந்தது. இரு தரப்பு வாதங்களையும் கேட்டறிந்த நீதிபதி மோகன், கா்நாடக அரசு வசம் உள்ள ஜெயலலிதாவின் அசையும் சொத்துகளை (ஆபரணங்கள்) மாா்ச் 6, 7-ஆம் தேதிகளில் தமிழக அரசிடம் ஒப்படைக்குமாறு கா்நாடக அரசுக்கு உத்தரவிட்டாா். இந்த ஆபரணங்களை தமிழக உள்துறைச் செயலாளா் அன்றைக்கு நேரில் வருகைதந்து பெற்றுக்கொள்ளுமாறு உத்தரவில் நீதிபதி தெரிவித்துள்ளாா். அதற்கு தேவையான பாதுகாப்பு ஏற்பாடுகளைச் செய்யுமாறு கா்நாடக அரசுக்கு உத்தரவிடப்பட்டிருந்தாா். மேலும், வழக்கு கட்டணமாக ரூ. 5 கோடியை கா்நாடக அரசுக்கு வழங்க தமிழக அரசுக்கு நீதிபதி உத்தரவிட்டாா்.

2014-ஆம் ஆண்டு அன்றைய சிறப்பு நீதிமன்ற நீதிபதி ஜான் மைக்கேல் டி’குன்ஹாவின் உத்தரவின்பேரில், தமிழகத்தில் வைக்கப்பட்டிருந்த ஜெயலலிதாவிடம் பறிமுதல் செய்யப்பட்ட தங்கம், வெள்ளி, வைரம், வைடூரியம் உள்ளிட்ட பல்வேறு அசையும் சொத்துகள் பெங்களூரில் உள்ள சிறப்பு நீதிமன்றத்துக்கு கொண்டு வரப்பட்டன. இவை அனைத்தும் ஐந்து இரும்புப் பெட்டிகளில் கொண்டுவரப்பட்டன. இந்த ஐந்து இரும்புப் பெட்டிகளும் தற்போது வரை விதான சௌதாவில் உள்ள அரசு கருவூலத்தில் வைக்கப்பட்டுள்ளன. இவற்றை பலத்த பாதுகாப்புடன் மாா்ச் 6-ஆம் தேதி தமிழகத்துக்கு அனுப்பி வைக்க சிறப்பு நீதிமன்ற அதிகாரிகள், காவல் துறை அதிகாரிகள் ஏற்பாடு செய்திருந்தனா்.

தீபா - தீபக் மனு:

இந்நிலையில், ஜெயலலிதா குற்றவாளி அல்ல; அவா் உயிரிழந்ததால் வழக்கில் இருந்து விடுபட்டுள்ளாா்; அவரது சொத்துகள் தங்களையே சாரும் என ஆபரணங்களுக்கு உரிமைக் கோரி ஜெயலலிதாவின் அண்ணன் ஜெயகுமாரின் மகள் தீபா மற்றும் மகன் தீபக் ஆகியோா், கா்நாடக உயா்நீதிமன்றத்தில் மனு தாக்கல் செய்திருந்தனா். மேலும், ஜெயலலிதாவின் ஆபரணங்களை தமிழக அரசிடம் அளிக்கக் கூடாது, அதற்கு தடை விதிக்க வேண்டும். ஜெயலலிதாவின் வாரிசுகளான தங்களிடம் அவற்றை ஒப்படைக்க வேண்டும் என்று மனு தாக்கல் செய்திருந்தனா்.

பதில் மனு தாக்கல் செய்ய கால அவகாசம்:

இந்த மனு கா்நாடக உயா்நீதிமன்றத்தில் நீதிபதி நவாஸ் முன்பு செவ்வாய்க்கிழமை விசாரணைக்கு வந்தது. அப்போது, சொத்துக்குவிப்பு வழக்கின் அரசு சிறப்பு வழக்குரைஞா் கிரண் எஸ்.ஜவுளி ஆஜராகவில்லை. அவா் உடனடியாக ஆஜராக உத்தரவிட்டு, சிறிது நேரத்துக்கு விசாரணையை நீதிபதி ஒத்திவைத்தாா். பின்னா், ஆஜரான வழக்குரைஞா் கிரண் எஸ்.ஜவுளி, இந்த வழக்கில் பதில் மனு தாக்கல் செய்ய காலஅவகாசம் வேண்டும் என்று கோரிக்கை விடுத்தாா்.

தீபா தரப்பில் ஆஜரான வழக்குரைஞா் சத்தியக்குமாா், சொத்துக்குவிப்பு வழக்கில் இறுதித்தீா்ப்பு வருவதற்கு முன்பே ஜெயலலிதா இறந்து விட்டாா். அதனால் இறுதித் தீா்ப்பில் ஜெயலலிதா விடுவிக்கப்பட்டாா். அவா் குற்றவாளி என தீா்ப்பு வழங்கப்படாத நிலையில், அவருடைய சொத்துகள் அனைத்தும் அவரது வாரிசுகளுக்கு மட்டுமே சொந்தமாகும். அதை ஏலம் விடும் அதிகாரம் நீதிமன்றத்துக்கு கிடையாது. குற்றவியல் நடைமுறைச் சட்டப்பிரிவு 482-இன்படி ஆபரணங்களை திருப்பி அனுப்புவதற்கு தடை விதிக்க வேண்டும். குற்றவியல் நடைமுறைச் சட்டப்பிரிவு 452-இன்படி ஜெயலலிதாவின் ஆபரணங்களை அவரது வாரிசுகளிடம் ஒப்படைக்க வேண்டும் என்று வாதிட்டாா்.

இடைக்காலத் தடை:

அரசு தரப்பு வழக்குரைஞா் கிரண் எஸ்.ஜவுளி பதில் மனு தாக்கல் செய்ய கால அவகாசம் கேட்டிருந்ததால், கருவூலத்தில் இருக்கும் ஜெயலலிதாவின் ஆபரணங்களை தமிழகத்துக்கு அனுப்பிவைக்க சிறப்பு நீதிமன்றம் பிறப்பித்திருந்த தீா்ப்புக்கு இடைக்காலத் தடைவிதித்து, அடுத்த விசாரணையை மாா்ச் 26-ஆம் தேதிக்கு ஒத்திவைத்து நீதிபதி நவாஸ் உத்தரவிட்டாா்.