துப்பாக்கியால் சுட்டு இளைஞா் கைது

கொலை, வழிப்பறி உள்ளிட்ட வழக்குகளில் தொடா்புடைய இளைஞரை போலீஸாா் துப்பாக்கியால் சுட்டு கைது செய்தனா்.

கா்நாடக மாநிலம், தும்கூரு மாவட்டம், அரெகெரே கிராமத்தைச் சோ்ந்தவா் ரோஹித் (27). கொலை, வழிப்பறி உள்ளிட்ட வழக்குகளில் தேடப்பட்டு வந்த இவா், ரௌடி பட்டியலிலும் இடம் பெற்றிருந்தாராம். கியாத சந்திரா காவல் சரகத்தில் சனிக்கிழமை மாலை ரோஹித் பதுங்கியிருப்பதாக வந்த தகவலையடுத்து, அங்கு சென்ற போலீஸாா் அவரைப் பிடிக்க முயன்றபோது, தலைமைக் காவலா் ஹனுமந்த ரங்கையாவை அரிவாளால் வெட்டிவிட்டு தப்பியோட முயன்றுள்ளாா்.

இதனையடுத்து காவல் ஆய்வாளா் முனிராஜ் தன்னிடமிருந்த கைத்துப்பாக்கியால், ரோஹித்தை வலது காலில் சுட்டுள்ளாா். இதில் கீழே விழுந்த அவரை போலீஸாா் கைது செய்து, சிகிச்சைக்காக மருத்துவமனையில் அனுமதித்துள்ளனா். காயமடைந்த தலைமைக் காவலா் ஹனுமந்த ரங்கையாவும் மருத்துவமனையில் அனுமதிக்கப்பட்டுள்ளாா். இது குறித்து கியாத சந்திரா போலீஸாா் விசாரணை மேற்கொண்டுள்ளனா்.