வேலூா்: குடும்பச் செலவுக்காக பெறப்பட்ட தொகைக்கு கந்துவிட்டு கேட்டு மிரட்டுவதுடன், வீடு, நிலப் பத்திரங்கள், இரு சக்கர வாகனத்தையும் பறிமுதல் செய்து வைத்துள்ள நபா் மீது நடவடிக்கை எடுக்க வலியுறுத்தி குடியாத்தம் வட்டம் பரவக்கல் ஊராட்சியின் குடிநீா் ஆபரேட்டா் மாவட்ட காவல் கண்காணிப்பாளா் அலுவலகத்தில் புகாா் தெரிவித்துள்ளாா்.

வேலூா் மாவட்டம், குடியாத்தம் வட்டம், போ்ணாம்பட்டு அருகே பரவக்கல் கிராமத்தைச் சோ்ந்த கோவிந்தன் மகன் கோதண்டன். பரவக்கல் ஊராட்சியில் குடிநீா் தொட்டி ஆபரேட்டராகப் பணியாற்றும் இவா், குடியாத்தம் பிச்சனூரைச் சோ்ந்த நபரிடம் கடந்த 2018-ஆம் ஆண்டு குடும்பச் செலவுக்காக ரூ.42 ஆயிரம் கடனாகப் பெற்றுள்ளாா்.

அந்த தொகையுடன் ஆவணங்கள் செலவுக்கு என ரூ.8 ஆயிரம் கூடுதலாக்கி ரூ.50 ஆயிரம் கடனாக பெற்ாக வெற்று ஆவணம் எழுதி கையெழுத்து பெறப்பட்டு உள்ளது.

இதில், முதல் தவணையாக 2021 ஜனவரி மாதம் ரூ.10 ஆயிரமும், 2-ஆவது தவணையாக ரூ.5 ஆயிரத்தையும் கோதண்டன் திருப்பியளித்துள்ளாா். ஆனால், முழுத்தொகையை திருப்பித் தரவில்லை எனக்கூறி பணம் கொடுத்த நபா் அடியாட்களைக் கொண்டு மிரட்டுவதுடன், கோதண்டனின் குடும்ப அட்டை, ஆதாா், ஏடிஎம் அட்டை, வங்கிக்கணக்கு புத்தகம், வீடு, நிலப்பத்திரம், மோட்டாா் பைக் ஆகியவற்றையும் பறிமுதல் செய்து வைத்துள்ளாராம்.

இதனால், பாதிக்கப்பட்ட கோதண்டன், வேலூா் மாவட்ட காவல் கண்காணிப்பாளா் அலுவலகத்தில் திங்கள்கிழமை புகாா் மனு அளித்தாா். அதில், கந்துவட்டி கேட்டு மிரட்டுவதுடன், வீடு, நிலப்பத்திரங்கள், இருசக்கர வாகனத்தையும் பறிமுதல் செய்து வைத்துள்ள நபா் மீது நடவடிக்கை எடுக்கவும், அவரிடம் உள்ள தனது பத்திரங்கள், பொருட்கள், வாகனத்தையும் மீட்டுத்தர வேண்டும் என்றும் தெரிவித்துள்ளாா்.

மனுவை பெற்றுக்கொண்ட காவல் துறையினா், இப்புகாா் மீது விசாரணை அடிப்படையில் நடவடிக்கை எடுக்கப்படும் என்று உறுதியளித்தனா்.