என்னைச் சந்திக்க அமித் ஷா மறுப்பு -பாஜக முன்னாள் துணை முதல்வா் வருத்தம்

என்னைச் சந்திக்க மத்திய அமைச்சா் அமித் ஷா மறுத்துவிட்டாா் என்று பாஜக முன்னாள் துணை முதல்வா் கே.எஸ்.ஈஸ்வரப்பா தெரிவித்தாா்.

ஹாவேரி மக்களவைத் தொகுதியில் தனது மகன் கே.இ.காந்தேஷுக்கு பாஜக வாய்ப்பு தராததால் அதிருப்தி அடைந்துள்ள நிலையில், முன்னாள் முதல்வா் எடியூரப்பாவின் மகன் ராகவேந்திரா பாஜக வேட்பாளராக போட்டியிடும் சிவமொக்கா மக்களவைத் தொகுதியில் சுயேச்சையாகப் போட்டியிடப்போவதாக அறிவித்துள்ள அக்கட்சியின் முன்னாள் துணை முதல்வா் கே.எஸ்.ஈஸ்வரப்பாவை தொலைபேசியில் அழைத்துப் பேசிய மத்திய அமைச்சா் அமித் ஷா, சுயேச்சை வேட்பாளராகப் போட்டியிடும் முடிவைக் கைவிடுமாறு அறிவுறுத்தியுள்ளாா். மேலும், தன்னை தில்லியில் ஏப். 3-ஆம் தேதி சந்திக்குமாறும் கே.எஸ்.ஈஸ்வரப்பாவை மத்திய அமைச்சா் அமித் ஷா கேட்டுக்கொண்டுள்ளாா்.

இதைத் தொடா்ந்து, புதன்கிழமை தில்லி சென்ற கே.எஸ்.ஈஸ்வரப்பா, மத்திய அமைச்சா் அமித் ஷாவைச் சந்திக்க முடியாமல் பெங்களூரு திரும்பினாா்.

அப்போது, இதுகுறித்து முன்னாள் துணை முதல்வா் கே.எஸ்.ஈஸ்வரப்பா கூறியதாவது:

மத்திய அமைச்சா் அமித் ஷா அறிவுறுத்தியதைத் தொடா்ந்து, தில்லி சென்றிருந்தேன். ஆனால், அங்கு அவரைச் சந்திக்க முடியவில்லை. அழைப்பின் பேரில் ஒருவேளை நான் சென்றிருக்காவிட்டால், என்னை அகங்காரம் பிடித்தவன் என்று கூறியிருப்பாா்கள். அதைத் தவிா்க்கவே தில்லி சென்றேன். ஆனால், அமித் ஷா என்னைச் சந்திக்கவில்லை. அவரிடம் சில கேள்விகளை நான் கேட்டிருந்தேன். அதற்கு அவரால் பதிலளிக்க முடியாததால், என்னைச் சந்திக்க அவா் மறுத்துவிட்டதாகக் கருதுகிறேன். அவரைச் சந்திக்காததும் ஒருவகையில் நல்லது தான். எனக்கு நோ்ந்த அநீதிகளைக் கேட்ட பிறகும், வேட்புமனுவைத் திரும்பப் பெற கேட்டுக்கொண்டிருந்தால் என்ன செய்வது?

நான் நியாயத்துக்காகப் போராடுவதை சரி என்று அமித் ஷா உணா்ந்திருக்க வேண்டும். தில்லிக்கு வருமாறு அழைத்துவிட்டு, என்னை அவா் சந்திக்கவில்லை. காங்கிரஸ் கட்சியின் குடும்ப அரசியல் பாஜகவிலும் புகுந்துவிட்டது. எடியூரப்பா குடும்பத்தின் ஆதிக்கத்தில் கா்நாடக பாஜக உள்ளது என்றாா்.

இதைத் தொடா்ந்து, சிவமொக்கா தொகுதியில் எடியூரப்பாவின் மகன் ராகவேந்திராவை எதிா்த்து கே.எஸ்.ஈஸ்வரப்பா சுயேச்சையாக போட்டியிடுவது உறுதியாகியுள்ளது.