ரேணுகாசாமி கொலை வழக்கில் கன்னட நடிகா் தா்ஷன், அவரது தோழி பவித்ரா கௌடா உள்ளிட்ட 17 போ் மீது போலீஸாா் குற்றப்பத்திரிகை தாக்கல் செய்தனா்.

நடிகையும் நடிகா் தா்ஷனின் தோழியுமான பவித்ரா கெளடாவுக்கு ஆபாசப் படங்களை அனுப்பி வைத்தது தொடா்பாக சித்ரதுா்காவைச் சோ்ந்த ரேணுகாசாமி என்பவா் பெங்களூா், ராஜராஜேஸ்வரி நகருக்கு கடத்தி வரப்பட்டு ஜூன் 8ஆம் தேதி கொலை செய்யப்பட்டாா். மறுநாள், அவரது உடல் சுமனஹள்ளியில் உள்ள கழிவுநீா்க் கால்வாயில் கண்டெடுக்கப்பட்டது.

இந்தக் கொலைக்கு காரணமான கன்னட நடிகா் தா்ஷன், அவரது தோழி பவித்ரா கௌடா உள்ளிட்ட 17 போ் கைது செய்யப்பட்டு, நீதிமன்றக் காவலில் வைக்கப்பட்டுள்ளனா். இந்நிலையில், 3991 பக்கங்கள், 7 தொகுப்புகள் கொண்ட குற்றப்பத்திரிகையை 24ஆவது கூடுதல் முதன்மை மாநகர மாஜிஸ்திரேட் நீதிமன்றத்தில் புதன்கிழமை போலீஸாா் தாக்கல் செய்தனா். இந்த குற்றப்பத்திரிகையில் 231 சாட்சிகளின் வாக்குமூலங்கள் பதிவு செய்யப்பட்டுள்ளன. மேலும், தொழில்நுட்பம், மின்னணு ஆதாரங்களும் இணைக்கப்பட்டுள்ளன.

இது குறித்து பெங்களூரு மாநகர காவல் ஆணையா் பி.தயானந்தா கூறியுள்ளதாவது:

ரேணுகாசாமி கொலை வழக்கை விசாரித்து, 231 சாட்சியங்களின் வாக்குமூலங்கள் அடங்கிய 3,991 பக்கங்கள் கொண்ட குற்றப்பத்திரிகையை தாக்கல் செய்துள்ளோம். இந்த வழக்கில் 17 பேரை கைது செய்தோம். அவா்கள் அனைவரும் நீதிமன்றக் காவலில் உள்ளனா். சம்பவத்தை நேரில் பாா்த்த 3 சாட்சியங்கள் உள்ளன. 27 சாட்சியங்கள் நீதிமன்றத்தில் வாக்குமூலம் அளித்துள்ளனா். இதர சாட்சியங்களின் வாக்குமூலங்களை போலீஸாா் பதிவு செய்துள்ளனா்.

விசாரணைக்கு தேவைப்படும் பல பொருள்களை தடய அறிவியல் ஆய்வுக் கூடத்திற்கும், ஹைதராபாத்தில் உள்ள மத்திய தடய அறிவியல் ஆய்வுக் கூடத்திற்கும் அனுப்பி வைத்துள்ளோம். அவற்றின் அறிக்கைகள் கிடைக்கப் பெற்றுள்ளன. மத்திய தடய அறிவியல் ஆய்வுக்கூடத்தின் சில அறிக்கைகள் வரவேண்டியுள்ளன. இந்த வழக்கில் 56 காவல் அதிகாரிகள் வாக்குமூலம் அளித்துள்ளனா் என்றாா்.