சேலத்தில் நடைபெற்றது பாமக பொதுக்குழு அல்ல என்று அன்புமணி தரப்பு செய்தித் தொடா்பாளா் வழக்குரைஞா் கே.பாலு கூறினாா்.

சென்னை தியாகராயநகரில் உள்ள கட்சி அலுவலகத்தில் அவா், செய்தியாளா்களிடம் திங்கள்கிழமை கூறியதாவது: அனைத்துக் கட்சிகளிலும் அதிகாரம் கொண்டது பொதுக்குழு. அந்த பொதுக் குழுவில் சில முடிவுகள் எடுப்பதற்கு முன்பு செயற்குழுவில் உயா்மட்ட தலைவா்கள் விவாதித்து, அதை பொதுக்குழுவுக்கு கொண்டுவந்து அதன்பிறகுதான் ஒப்புதல் கொடுப்பாா்கள். இதுதான் நடைமுறை.

எனவே, சேலத்தில் பாமக நிறுவனா் ராமதாஸ் தலைமையில் நடந்தது பொதுக்குழுவே இல்லை. இந்தக் கூட்டத்தில் எடுக்கப்பட்ட எந்த முடிவுகளும், தீா்மானங்களும் பாமகவை கட்டுப்படுத்தாது. பாமக பொதுக்குழு என்று கூறிவிட்டு, அதில் எப்படி பசுமைத் தாயகம் அமைப்பின் தலைவரை மாற்ற முடியும் எனத் தெரியவில்லை.

அந்த அமைப்பின் தலைவரான சௌமியா அன்புமணியை மாற்றிவிட்டதாக, பொதுக்குழுக் கூட்டத்தில் அறிவித்துள்ளனா். பசுமைத் தாயகம் அமைப்பின் தலைவரை மாற்ற வேண்டுமெனில், அந்த அமைப்பு கூடி அதற்கான முடிவை எடுக்க முடியும். எனவே, அந்த அறிவிப்பும் செல்லாது.

செயற்குழு, பொதுக் குழு கூட்டங்களுக்கான அடிப்படை கூடத் தெரியாமல் கூட்டத்தைக் கூட்டியிருக்கின்றனா் என்று வழக்குரைஞா் கே.பாலு கூறினாா்.