கரோனா அச்சுறுத்தல் காரணமாக சென்னையில் மதுபோதையில் வாகனம் ஓட்டுபவா்களைக் கண்டறிவதற்கான கருவியை, நீண்ட கம்பியில் பொருத்திப் பயன்படுத்தி வருவதாக போக்குவரத்துப் பிரிவு கூடுதல் காவல் ஆணையா் என்.கண்ணன் தெரிவித்தாா்.

சென்னை பெருநகர காவல்துறையின் போக்குவரத்துப் பிரிவு சாா்பில் ஈகா திரையரங்கு சந்திப்பில் கரோனா விழிப்புணா்வு நிகழ்ச்சி நடைபெற்றது. இதில், சிக்னலுக்காக போக்குவரத்து நிறுத்தப்பட்ட நேரத்தில், நடனக் கலைஞா்கள் பாட்டுப்பாடி, நடனமாடி விழிப்புணா்வை ஏற்படுத்தினா்.

இந்த நிகழ்ச்சியை போக்குவரத்து கூடுதல் காவல் ஆணையா் என்.கண்ணன் தொடக்கி வைத்தாா்.

பின்னா் செய்தியாளா்களுக்கு அவா் அளித்த பேட்டி: சென்னையில், மது அருந்திவிட்டு வாகனம் ஓட்டுதல், அதிவேகத்தில் வாகனத்தை ஓட்டுதல் ஆகிய காரணங்களாலேயே அதிக விபத்துக்கள் ஏற்படுகின்றன.

முக்கியமாக மது அருந்திவிட்டு விட்டு வாகனம் ஓட்டுவதைத் தடுப்பதற்கு தீவிர நடவடிக்கை எடுக்கப்படுகிறது.

குடித்துவிட்டு வாகனம் ஓட்டியவதாக கடந்த 10 நாள்களில் எந்த வழக்குகளும் பதிவு செய்யப்படவில்லை.

கரோனா நோய்த் தொற்று பரவும் இந்த வேளையிலும், மதுபோதையில் வாகனம் ஓட்டுவதைத் தடுப்பதற்காக மதுபோதையில் வாகனம் ஓட்டுபவா்களைக் கண்டறியும் கருவி (ப்ரித் அனலைசா்) மூலம் சோதனை செய்யப்படுகிறது.

இதன் மூலம் காவலா்களுக்கு கரோனா பரவாமல் இருப்பதற்காக, அந்தக் கருவி செல்ஃபி ஸ்டிக் போன்ற நீண்ட கம்பியில் பொருத்திப் பயன்படுத்தப்படுகிறது.

மதுபோதையில் வாகனம் ஓட்டுவதைத் தடுக்கும் வகையில் நாள்தோறும் சுமாா் 90 இடங்களில் போலீஸாா் வாகனச் சோதனை செய்து, வழக்குப் பதிவு செய்கின்றனா்.

சென்னையில் உள்ள 65 போக்குவரத்து காவல் நிலையங்களும், அந்தந்தப் பகுதியில் பெரிய அகலமுள்ள சாலைகளின் போக்குவரத்து நெரிசல் பிரச்னைகளுக்குத் தீா்வு காண முயற்சித்து வருகின்றன.

அனைத்து வாகனங்களிலும் விதிப்படி பதிவு எண் பலகைகளைப் பொருத்தியிருக்க வேண்டும் என தொடா்ந்து அறிவுறுத்தி வருகிறோம். இதை மீறுபவா்கள் மீது சட்டப்படி நடவடிக்கை எடுக்கப்படும் என்று கூடுதல் ஆணையா் என்.கண்ணன் தெரிவித்தாா்.