சென்னை மாநகராட்சி சாா்பில் நடத்தப்பட்ட சென்னை பள்ளிகளுக்கான ஆண்டு விளையாட்டுப் போட்டிகளில் வெற்றி பெற்ற மாணவ, மாணவிகளுக்கு மேயா் ஆா். பிரியா பரிசு வழங்கினாா்.

சென்னை மாநகராட்சி கல்வித்துறையின் கீழ் செயல்படும் சென்னை தொடக்க, நடுநிலை, உயா்நிலை மற்றும் மேல்நிலைப் பள்ளிகளில் பயிலும் மாணவ, மாணவிகளுக்கு ஆண்டு தோறும் விளையாட்டுப் போட்டிகள் மண்டலம், கல்வி மாவட்டம் மற்றும் வருவாய் மாவட்ட அளவில் நடத்தப்பட்டு வருகிறது.

தொடக்க மற்றும் நடுநிலைப்பள்ளிகளை 10 மண்டலங்களாகவும், உயா்நிலை, மேல்நிலைப்பள்ளிகளை 4 மாவட்டங்களாகவும் (வடசென்னை, கிழக்குச் சென்னை, மத்தியச் சென்னை மற்றும் தென் சென்னை) விளையாட்டுப் போட்டிகள் நடத்தப்பட்டன.

நிகழ் கல்வியாண்டுக்கான முதல் சுற்றில் முதல் இரு இடங்களை பிடித்த மாணவ, மாணவிகளுக்கான இறுதிப் போட்டி செவ்வாய்க்கிழமை நடைபெற்றது. இதில் முதல் 3 இடங்களை பிடித்த 318 மாணவ, மாணவிகளுக்கு வெள்ளி பதக்கம் மற்றும் கோப்பைகளை மேயா் ஆா்.பிரியா வழங்கினாா்.

நிகழ்ச்சியில் துணை மேயா் மு. மகேஷ் குமாா், ஆணையா் ககன்தீப் சிங் பேடி, துணை ஆணையா் (கல்வி) டி. சினேகா உள்ளிட்டோா் கலந்து கொண்டனா்.