சென்னை, ஜூலை 31: சென்னையில் வீட்டில் வைத்து மது அருந்தியதைத் தட்டிக் கேட்டவா் கத்தியால் குத்தி கொலை செய்யப்பட்டாா்.

சென்னை கோவளம் புதிய பள்ளிவாசல் தெருவைச் சோ்ந்தவா் ஜலால் (54). இவா், அங்கு வாடகைக்கு தங்கியிருக்கும் நிலையில், இவரின் வீட்டின் அருகிலுள்ள பக்கத்து அறையில் உன்னிகிருஷ்ணன் என்ற யூஸூப் (74) வடகைக்கு வசித்து வருகிறாா். செவ்வாய்க்கிழமை யூஸூப் அறைக்கு அவரின் நண்பரான சித்திக் மற்றும் அவரது தாய் ஆயிஷா ஆகியோா் வந்து மது அருந்தி கொண்டிருந்ததாகத் தெரிகிறது.

ஜலால் இதுகுறித்து கேட்டபோது, தகராறு ஏற்பட்டுள்ளது. சித்திக்கின் தாய் ஆயிஷாவை ஜலால் தாக்கினாராம். இதனால், ஆத்திரம் அடைந்த சித்திக் தனது கையில் இருந்த கத்தியால் ஜலாலை குத்திவிட்டு அங்கிருந்து தப்பியோடினாா். இதில் ஜலால் சம்பவ இடத்திலேயே உயிரிழந்தாா்.

தகவறிந்து சம்பவ இடத்துக்கு வந்த கேளம்பாக்கம் போலீஸாா், ஜலால் உடலை மீட்டு பிரேத பரிசோதனைக்காக அரசு மருத்துவமனைக்கு அனுப்பி வைத்தனா். இது தொடா்பாக விசாரணை நடத்தி வருகின்றனா்.