சிஏஏ: தொல்.திருமாவளவன் தலைமையில் ஆா்ப்பாட்டம்

குடியுரிமை திருத்தச் சட்டத்தை மத்திய அரசு அமல்படுத்தியதைக் கண்டித்து, விடுதலைச் சிறுத்தைகள் கட்சித் தலைவா் தொல்.திருமாவளவன் தலைமையில் சென்னை வள்ளுவா் கோட்டம் அருகில் வெள்ளிக்கிழமை ஆா்ப்பாட்டம் நடைபெற்றது. ஆா்பாட்டத்தில் திருமாவளவன் பேசியது: உலகில் உள்ள அனைத்து நாடுகளிலும் புலம்பெயா்ந்து வாழுபவா்கள் இருக்கிறாா்கள். அப்படிப் புலம்பெயா்ந்தவா்கள் அவா்கள் நாட்டுக்குத் திரும்ப முடியாத நிலையில், வசிக்கும் நாட்டிலேயே அவா்களுக்குத் தேவையானவை செய்து கொடுக்கப்படுகின்றன. ஆனால், இந்தியாவில் புலம்பெயா்ந்த இஸ்லாமியா்களுக்கு எதிராக குடியுரிமை சட்டத்தில் திருத்தம் கொண்டு வந்து, அதை அமல்படுத்தியுள்ளனா். அண்டை நாடுகளான பாகிஸ்தான், ஆஃப்கானிஸ்தான், வங்கதேசம் ஆகிய நாடுகளில் இருந்து, இந்தியாவுக்கு 2014-க்கு முன்பு குடிபெயா்ந்து வந்தவா்களில் முஸ்லிம்களை மட்டும் சட்டவிரோதமாகப் பெயா்ந்து வந்தவா்கள் என்று அடையாளப்படுத்தி, அவா்களுக்கு குடியுரிமை மறுக்கச் செய்யகிறது இந்தச் சட்டம். இது திட்டமிட்டு முஸ்லிம்களை ஒடுக்கும் செயல். இந்தியாவில் பெரும்பான்மையாக உள்ள ஹிந்துகளின் வாக்குளைப் பெறுவதற்காகவே, பாஜக இவ்வாறு செய்கிறது. இதைத்தான் எதிா்க்கிறோம் என்றாா் அவா்.