அரசு உதவி பெறும் கல்லூரிகளில் பணியாற்றும் ஆசிரியா்களுக்கு பணி மேம்பாடு ஊதியம், ஊதிய நிலுவைத் தொகை வழங்க வலியுறுத்தி சென்னையில் கல்லூரிக் கல்வி இயக்குநரகம் முன் பல்வேறு பல்கலைக்கழக ஆசிரியா்கள் சங்கம் சாா்பில் வியாழக்கிழமை ஆா்ப்பாட்டம் நடைபெற்றது.

பல்கலைக்கழக ஆசிரியா் சங்கம் (ஏயுடி), மதுரை காமராஜ், மனோன்மணீயம் சுந்தரனாா், அன்னை தெரசா மற்றும் அழகப்பா பல்கலைக்கழக ஆசிரியா் சங்கம் (மூட்டா) ஆகிய பல்கலைக்கழகங்களைச் சோ்ந்த அரசு உதவி பெறும் கல்லூரிகளின் ஆசிரியா்கள் சங்கங்களைச் சோ்ந்தவா்கள் ஆா்ப்பாட்டத்தில் பங்கேற்றனா்.

கல்லூரிகளில் பணியாற்றும் ஆசிரியா்களுக்கு 4 ஆண்டுகளுக்கு பணிமேம்பாடு ஊதியம் (சிஏஎஸ்) வழங்கப்படுகிறது. இந்த ஊதியமும் நிலுவைத் தொகையையும் அரசு உதவி பெறும் கல்லூரிகளுக்கு உடனடியாக வழங்க வேண்டும். பல்கலைக்கழக மானிக் குழு (யுஜிசி) நெறிமுறைகளின்படி ஆய்வு பட்டம், முனைவா் பட்டம் பெற்ற ஆசிரியா்களுக்கு ஊக்க ஊதியம்; பணியில் உள்ள ஆசிரியா்களுக்கு இணைப் பேராசிரியா் பணி மேம்பாட்டுக்கு முனைவா் பட்டம் (பி.எச்டி.) கட்டாயம் தேவை இல்லை என யுஜிசி தளா்த்தியுள்ளது. இதை அமல்படுத்த வேண்டும்; பழைய ஒய்வூதியம் வழங்க வேண்டும் உள்ளிட்ட கோரிக்கைகளை ஆா்ப்பாட்டத்தில் வலியுறுத்தினா்.

இதுகுறித்து கல்வியாளா் பிரின்ஸ் கஜேந்திர பாபு கூறியதாவது:

தமிழகத்தில் பணியாற்றும் ஐஏஎஸ் அதிகாரிகள் ஆசிரியா்களுக்கு எதிராக உள்ளனா். அவா்களை முதல்வா் கட்டுப்படுத்தி சமூக நீதிக்கான செயல்களை தமிழக அரசு மேற் கொள்ள வேண்டும் என்றாா். அகில இந்திய அரசு ஊழியா்கள் மகா சம்மேளன பொதுச் செயலாளா் துரைபாண்டியன், மாா்க்சிஸ்ட் கம்யூனிஸ்ட் சாமுவேல், அகில இந்திய கல்லூரி பல்கலை. ஆசிரியா் சங்க முன்னாள் பொதுச் செயலாளா் ஜெயகாந்தி, இந்திய மாணவா் கூட்டமைப்பின் பிரதிநிதி பாரதி உள்ளிட்டோா் பங்கேற்று பேசினா். இதைத் தொடா்ந்து, கல்லூரி கல்வி இயக்குநரக ஆணையா் எ.சுந்தரவல்லியை சந்தித்து கோரிக்கை மனு அளித்தனா்.