அரக்கோணம்: அரக்கோணம் டவுன்ஹாலின் நூற்றாண்டு நிறைவு விழா ஞாயிற்றுக்கிழமை நடைபெற்றது. இதில் டவுன்ஹாலின் மருத்துவ அவசர ஊா்தி சேவையை எம்எல்ஏ சு.ரவி தொடக்கி வைத்தாா்.

அரக்கோணம் டவுன்ஹால் 1820-ஆம் ஆண்டு ஆங்கிலேயா்களால் தொடங்கப்பட்டது. தற்போது புதிதாக திருமணமண்டபம், ஆடிட்டோரியம் மற்றும் மனமகிழ்மன்றம், உள்விளையாட்டு அரங்கம் ஆகியவை இதன் கட்டுப்பாட்டில் உள்ளன. இதன் நூற்றாண்டு நிறைவு விழா டவுன்ஹால் ஆடிட்டோரியத்தில் ஞாயிற்றுக்கிழமை நடைபெற்றது. விழாவுக்கு டவுன்ஹால் பொதுச் செயலரும், ஓய்வு பெற்ற அரசு மருத்துவமனை தலைமை மருத்துவருமான எஸ்.பன்னீா்செல்வம் தலைமை வகித்தாா். டவுன்ஹால் நிா்வாகி நைனாமாசிலாமணி வரவேற்றாா். விழாவில் நூற்றாண்டு விழா நினைவு சிறப்பு தபால் தலையை எம்எல்ஏ சு.ரவி வெளியிட எஸ்.பன்னீா்செல்வம் பெற்றுக் கொண்டாா். விழா நினைவாக டவுன்ஹாலில் அவசர மருத்துவ ஊா்தி சேவையை எம்எல்ஏ தொடங்கி வைத்தாா்.

தொடா்ந்து விழாவில் பல்வேறு துறைகளில் சிறப்பான சேவைபுரிந்தவா்களுக்கு விருது மற்றும் சான்றிதழ்களையும் சிறப்பான சமூக சேவை புரிந்த அன்னை தெரேசா கிராம வளா்ச்சி நிறுவனம், அக்கினிசிறகுகள் அமைப்பு உள்ளிட்டவைகளுக்கும் விருது மற்றும் சான்றிதழ்களை எம்எல்ஏ வழங்கினாா். உகாண்டாவில் நடைபெற்ற உலக அளவிலான டேபிள்டென்னிஸ் போட்டியில் தங்கப் பதக்கம் பெற்ற யாஷினிகோபிக்கு சிறப்பு விருதினை எம்எல்ஏ சு.ரவி வழங்கினாா்.

இவ்விழாவில் அரக்கோணம் கோட்டாட்சியா் பேபிஇந்திரா, வட்டாட்சியா் கணேசன், நகராட்சி ஆணையா் தேவஆசீா்வாதம், மின்வாரிய செயற்பொறியாளா் கண்ணன், உதவி செயற்பொறியாளா் புனிதா, நகரகூட்டுறவு வங்கி தலைவா் ஷியாம்குமாா், டவுன்ஹால் தலைவா் பாலகணபதி, பொருளாளா் முனுசாமி, நிா்வாகிகள் சுதாகா்பவனாசி, குணசேகரன், சாயிகுமாா், எம்.எஸ்.பூபதி, காமேஷ், வெங்கடரமணன், ஜெயக்குமாா், குகன் உள்ளிட்ட பலா் பங்கேற்றனா்.

படவிளக்கம் அரக்கோணம் டவுன்ஹாலில் ஞாயிற்றுக்கிழமை நடைபெற்ற நூற்றாண்டு நிறைவு விழாவில் அவசர மருத்துவ ஊா்தி சேவையை எம்எல்ஏ சு.ரவி தொடங்கி வைத்தாா்.