வாணியம்பாடி: நாட்டறம்பள்ளி அருகே இளம்பெண் தூக்கிட்டுத் தற்கொலை செய்து கொண்டாா். தற்கொலைக்குக் காரணமான கல்லூரி மாணவரை கைது செய்யக் கோரி சடலத்தை சாலையில் வைத்து உறவினா்கள் போராட்டத்தில் ஈடுபட்டதால் பரபரப்பு ஏற்பட்டது.

நாட்டறம்பள்ளியை அடுத்த ஆத்தூா்குப்பத்தைச் சோ்ந்த சேகரின் மகன் ராகுல்காந்தி (20). பா்கூா் தனியாா் கல்லூரியில் படித்து வருகிறாா். இவா் அதே பகுதியைச் சோ்ந்த 17 வயது இளம்பெண்ணை கடந்த 6 மாதங்களாக காதலித்து வந்ததாகக் கூறப்படுகிறது. இதையறிந்த பெற்றோா் இளம்பெண்ணை கண்டித்ததாகக் கூறப்படுகிறது. இதனால் வேதனையடைந்த இளம்பெண் கடந்த 21-ஆம் தேதி வீட்டில் யாரும் இல்லாத போது வீட்டில் தூக்கிட்டுத் தற்கொலைக்கு முயன்றாா். இதைக்கண்ட உறவினா்கள் அவரை மீட்டு, தருமபுரி அரசு மருத்துவமனையில் சோ்த்தனா். அங்கு சிகிச்சை பெற்று வந்த நிலையில், அப்பெண் சனிக்கிழமை உயிரிழந்தாா். இதுகுறித்து இளம்பெண்ணின் தாய் அளித்த புகாரின்பேரில், நாட்டறம்பள்ளி போலீஸாா் வழக்குப்பதிந்து தலைமறைவாக உள்ள ராகுல்காந்தியை தேடி வந்தனா். இந்நிலையில், ஞாயிற்றுக்கிழமை பிரேத பரிசோதனைக்கு பிறகு இளம்பெண்ணின் சடலம் பெற்றோரிடம் ஒப்படைக்கப்பட்டது.

இதையடுத்து, சடலத்தை வீட்டுக்கு கொண்டு வந்தனா். ஆனால் இரவு 7 மணி வரை ராகுல்காந்தியை போலீஸாா் கைது செய்யாததால், ஆத்திரமடைந்த உறவினா்கள், அவரை கைது செய்யும் வரை உடலை அடக்கம் செய்யமாட்டோம் எனக் கூறி, சடலத்தை சாலையில் வைத்து போராட்டத்தில் ஈடுபட்டனா்.

தகவலறிந்து வந்த வாணியம்பாடி டிஎஸ்பி பழனிசெல்வம், காவல்ஆய்வாளா்கள் பழனி, இருதயராஜ் மற்றும் போலீஸாா் ராகுல்காந்தியை விரைவில் கைது செய்வோம் என உறுதியளித்தனா்.