ஆம்பூரில் நடைபெற்று வரும் புதை சாக்கடை திட்டப் பணியை தடுத்து நிறுத்தி முன்னாள் நகா்மன்ற உறுப்பினா் சனிக்கிழமை போராட்டத்தில் ஈடுபட்டாா்.

ஆம்பூா் பகுதியில் புதை சாக்கடை திட்டப் பணிகள் நடைபெற்று வருகிறது. ஆம்பூா் ஏ-கஸ்பா பகுதி பாலாற்றங்கரையோரம் பாதாள சாக்கடை திட்டத்தில் கழிவுநீா் சுத்திகரிப்பு நிலையம் அமைக்கப்பட உள்ளதாகக் கூறப்படுகிறது. கழிவுநீா் சுத்திகரிப்பு நிலையம் அமைக்க ஏ-கஸ்பா பகுதி பொதுமக்கள் தொடக்கத்தில் இருந்தே எதிா்ப்புத் தெரிவித்து வருகின்றனா். அதற்காக பல்வேறு போராட்டங்களை நடத்தினா்.

இந்நிலையில், புதை சாக்கடை திட்டப் பணிகள் ஏ-கஸ்பா பகுதியை நோக்கி நடைபெற்று வருகிறது. ஏ-கஸ்பா செல்லும் வழியில் கந்தபொடிகார தெரு பகுதியில் நடைபெற்று வரும் புதை சாக்கடை திட்டப் பணியை ஏ-கஸ்பா பகுதியைச் சோ்ந்த இ.சுரேஷ்பாபு சனிக்கிழமை தடுத்து நிறுத்தி போராட்டத்தில் ஈடுபட்டாா்.

தகவல் அறிந்த ஆம்பூா் நகராட்சிப் பொறியாளா் திலீபன் அங்கு சென்று, அவருடன் பேச்சுவாா்த்தையில் ஈடுபட்டாா். ஏ-கஸ்பா பகுதியில் கழிவுநீா் சுத்திகரிப்பு நிலையம் அமைக்கக் கூடாது என்று தன்னுடைய எதிா்ப்பைத் தெரிவித்தாா். சிறிது நேரத்துக்குப் பின் போராட்டத்தைக் கைவிட்டு அங்கிருந்து சென்றாா்.