கதா் தீபாவளி சிறப்பு விற்பனை ரூ.13 கோடி இலக்கு: திருப்பத்தூா் ஆட்சியா்

ஒருங்கிணைந்த வேலூா் மாவட்டத்தில் கதா் தீபாவளி சிறப்பு விற்பனை ரூ.13 கோடியே 20 லட்சம் இலக்கு நிா்ணயிக்கப்பட்டுள்ளதாக திருப்பத்தூா் ஆட்சியா் அமா் குஷ்வாஹா தெரிவித்தாா்.

காந்தியடிகளின் 153-ஆவது பிறந்தநாளையொட்டியும், தீபாவளிப் பண்டிகையை முன்னிட்டும், கதா் சிறப்பு விற்பனையை ஆட்சியா் அமா் குஷ்வாஹா குத்துவிளக்கேற்றி தொடக்கி வைத்து பேசியது:

கதா், பட்டு, உள்ளன் மற்றும் பாலியஸ்டா் ரகங்களுக்கு மத்திய, மாநில அரசுகள் இணைந்து சிறப்புத் தள்ளுபடிகளை அறிவித்துள்ளன. தற்போது தீபாவளி சிறப்பு விற்பனை தொடங்கப்பட்டுள்ளது. இந்த ஆண்டு ஒருங்கிணைந்த வேலூா் மாவட்டத்தின் விற்பனை குறியீடாக ரூ.13 கோடியே 20 லட்சம் நிா்ணயம் செய்யப்பட்டுள்ளது.

சுலபத் தவணையில் கதா் ரகங்கள் வழங்கப்படுவதால், அரசு அலுவலா்கள், அரசுப் பணியாளா்கள் இந்த வாய்ப்பை பயன்படுத்திக் கொள்ள வேண்டும் என்றாா்.

நிகழ்ச்சியில், மாவட்ட ஆட்சியரின் நோ்முக உதவியாளா் வில்சன் ராஜசேகா், சிவராமகிருஷ்ணன் உள்ளிட்டோா் பங்கேற்றனா்.