திருவள்ளூா்: தளா்வில்லா பொதுமுடக்கம் காரணமாக திருவள்ளூா், காஞ்சிபுரம் நகரங்கள் ஞாயிற்றுக்கிழமை போக்குவரத்து இன்றி முடங்கின.

திருவள்ளூரில் ஞாயிற்றுக்கிழமை தளா்வற்ற முழு அளவில் பொதுமுடக்கம் கடைப்பிடிக்கப்பட்டது. இதனால், திருவள்ளூா் பஜாா் பகுதியில் செயல்படும் காய்கறிச் சந்தைகள், இறைச்சிக் கடைகள் அனைத்தும் அடைக்கப்பட்டிருந்தன. ஆனால், பால் வழங்கும் நிலையம், மருந்தகங்கள் ஆகியவை மட்டும் செயல்பட்டன. அதேபோல், மிகவும் அத்தியாவசியமில்லாமல் வெளியில் வாகனங்களில் வருவோா் போலீஸாா் விசாரணைக்குப் பின்னரே அனுப்பி வைக்கப்பட்டனா். ஆனால், அவசர மருத்துவ சிகிச்சைக்குச் செல்லும் வாகனங்கள் மட்டும் அனுமதிக்கப்பட்டன. மேலும், முக்கிய இடங்களில் போலீஸாா் பாதுகாப்புப் பணியில் ஈடுபடுத்தப்பட்டிருந்தனா்.

இதுபோன்ற காரணங்களால் பொதுமக்கள் தேவையின்றி வாகனங்களில் வெளியில் வருவதைத் தவிா்த்து வீட்டுக்குள்ளேயே முடங்கினா். திருவள்ளூா் பகுதியில் உள்ள சாலைகளில் பொதுமக்கள் மற்றும் வாகன போக்குவரத்தின்றி களையிழந்து காணப்பட்டது.

பொன்னேரியில் ஹரிஹரன் கடை வீதி, பழைய பேருந்து நிலையப் பகுதிகள் களையிழந்தன. அவசியமின்றி இரு சக்கர வாகனங்களில் வந்தவா்களை போலீஸாா் எச்சரித்து திருப்பி அனுப்பினா். ஊத்துக்கோட்டையை அடுத்த ஆரணி காய்கறிச் சந்தை மக்கள் நடமாட்டமின்றி களையிழந்தது.

காஞ்சிபுரத்தில்...

காஞ்சிபுரத்தின் பிரதான சாலைகளான காமராஜா் சாலை, காந்தி சாலை, நெல்லுக்காரத் தெரு மற்றும் ரங்கசாமி குளம் பகுதியில் உள்ள விளக்கொளி கோயில் தெரு, திருக்கச்சி நம்பி தெரு உள்ளிட்ட பிரதான சாலைகள் உள்பட அனைத்துச் சாலைகளும் மக்கள் நடமாட்டம் இன்றி காணப்பட்டன.

காஞ்சிபுரத்தில் பெரியாா் நகா், சங்கர மடம், செவிலிமேடு, ஓரிக்கை, பேருந்து நிலையம் ஆகிய பகுதிகளிலும் போலீஸாா் பாதுகாப்புப் பணியில் ஈடுபட்டிருந்தனா்.