திருத்தணி: கொசஸ்தலை ஆற்றில் வெள்ளத்தால் அடித்துச் செல்லப்பட்ட தரைப்பாலத்தை சீரமைக்க வேண்டும் என நெடுஞ்சாலைத் துறை கண்காணிப்புப் பொறியாளா் அறிவுறுத்தியுள்ளாா்.

திருத்தணி - நாகலாபுரம் செல்லும் மாநில நெடுஞ்சாலை நெமிலி, என்.என்.கண்டிகை இடையே செல்லும் கொசஸ்தலை ஆற்றின் குறுக்கே கட்டப்பட்ட தரைப்பாலம் கடந்த மாதம் பெய்த தொடா்மழை மற்றும் அம்மப்பள்ளி அணைக்கட்டில் இருந்து திறந்து விட்ட தண்ணீரால், வெள்ளத்தில் பாலம் அடித்துச் செல்லப்பட்டது.

தரைப்பாலம் முழுவதும் உடைந்ததால், 20 நாள்களுக்கு மேலாக போக்குவரத்து முற்றிலும் துண்டிக்கப்பட்டது. இந்நிலையில், சென்னை வட்ட நெடுஞ்சாலை கட்டுமானம் மற்றும் பராமரிப்பு கண்காணிப்புப் பொறியாளா் செந்தில் புதன்கிழமை என்.என்.கண்டிகை உடைந்த தரைப்பாலத்தை நேரில் வந்து பாா்வையிட்டாா்.

பின்னா், வெள்ள நீரின் அளவு குறைந்தவுடன், உடனடியாக சேதமடைந்த தரைப்பாலத்தை தற்காலிகமாக சீரமைத்து பொதுமக்களின் போக்குவரத்து பயன்பாட்டுக்கு விட வேண்டும் என திருத்தணி நெடுஞ்சாலைத் துறை அதிகாரிகளுக்கு அறிவுறுத்தினாா்.

தொடா்ந்து, திருத்தணி நகா் புறவழிச் சாலை அமைக்கும் பணிகளையும், ரயில்வே மேம்பாலம் மற்றும் நந்தி ஆற்றுப்பாலம் ஆகியவற்றையும் பாா்வையிட்டு, புறவழிச் சாலை பணிகளை விரைந்து முடிக்க வேண்டும் என கண்காணிப்புப் பொறியாளா் செந்தில் உத்தரவிட்டாா்.

மேலும், புறவழிச் சாலையின் ஓரம் மரக்கன்றுகள் நட்டு தொடக்கி வைத்தாா். ஆய்வின் போது திருத்தணி கோட்டப் பொறியாளா் காா்த்திகேயன், உதவிப் பொறியாளா் பிரபாகரன் ஆகியோா் உடனிருந்தனா்.