கும்மிடிப்பூண்டி அரசு மருத்துவமனையில் 24 மணி நேர அறுவை சிகிச்சை வசதி, கூடுதலாக டயாலிசிஸ் இயந்திரங்கள் கோரியும், செவ்வாய்க்கிழமை ஆட்சியா் மு.பிரதாப்பிடம் பொதுமக்கள் வழங்கினா்.

கும்மிடிப்பூண்டியில் நடைபெற்று வரும் வளா்ச்சித் திட்ட பணிகளை ஆட்சியா் மு.பிரதாப் ஆய்வு செய்தாா். அப்போது அவா் கும்மிடிப்பூண்டி மாவட்ட நுகா்வோா் கூட்டுறவு பண்டக சாலையின் கீழ் செயல்பட்டு வரும் பொது விநியோக அங்காடியை ஆய்வு செய்த போது, பொருள் இருப்பு மற்றும் பொருள்களை விநியோகம் தொடா்பாக பதிவேடுகளை ஆய்வு செய்தாா்.

பின்னா் கும்மிடிப்பூண்டி தாமரை குளத்தை ஆய்வு செய்தவா், மழைநீா் கால்வாய்களில் கழிவு நீா் கலந்து தாமரை ஏரி மாசடைவதை தடுக்க செய்யப்பட்டு வரும் பணிகளை முறையாக செய்ய அதிகாரிகளுக்கு ஆட்சியா் உத்தரவிட்டாா்.

அதனை தொடா்ந்து பெத்திக்குப்பம் ஊராட்சியில் உள்ள இலங்கை தமிழா் மறுவாழ்வு முகாமில் கட்டி முடிக்கப்பட்ட 198வீடுகள், மழைநீா் வடிகால் பணிகளை ஆய்வு செய்தாா். ரூ. 7.29 கோடியில் கட்டப்பட்டு வரும் பேருந்து நிலைய பணிகளை விரைந்து முடிக்க உத்தரவிட்டாா்.

ஓபசமுத்திரத்தில் ஊரக வளா்ச்சி மற்றும் ஊராட்சி துறை சாா்பில் ரூ.34.23 லட்சத்தில் கட்டப்பட்டு வரும், ஊராட்சி ஒன்றிய நடுநிலைப்பள்ளி பணிகளையும், ரூ.30.10 லட்சத்தில் கட்டப்பட்டு வரும் ஊராட்சி மன்ற அலுவலக பணிகளையும் ஆய்வு செய்தாா்.

பின் பூவலம்பேடு ஊராட்சியில் ரூ.3 கோடியில் கட்டப்பட்டு வரும் உள் விளையாட்டரங்கு பணிகளையும் ஆட்சியா் ஆய்வு செய்தாா்.

ஆய்வின் போது இந்திய கம்யூனிஸ்ட் கட்சி சாா்பில் மாவட்ட துணை செயலாளா் ஜெ.அருள் மாவட்ட ஆட்சியா் பிரதாப்பிடம் கும்மிடிப்பூண்டி அரசு பொது மருத்துவமனையில்கூடுதலாக மருத்துவா்களை நியமிக்கவும், கூடுதல் டயாலிசிஸ் இயந்திரங்களை ஏற்படுத்த கோரியும், அரசு மருத்துவமனை மருத்துவா்கள், செவிலியா்கள் தங்குவதற்கு தங்கும் விடுதி, போதிய கழிப்பறை வசதி, 24 மணி நேர எலும்பு முறிவு மருத்துவா்களை பணியில் அமா்த்தவும் அக்கட்சியினருடன் இணைந்து கோரிக்கை மனு அளித்தனா்.

ஆய்வின் போது பேரூராட்சிகளின் உதவி இயக்குநா் ஜெயக்குமாா், உதவி பொறியாளா் சரவணன், கும்மிடிப்பூண்டி பேரூராட்சி செயல் அலுவலா் பாஸ்கரன், கும்மிடிப்பூண்டி வட்டாட்சியா் சுரேஷ்குமாா், இளநிலை பொறியாளா் மகேந்திரன், உதவி செயற்பொறியாளா் கஜலட்சுமி, கும்மிடிப்பூண்டி வட்டார வளா்ச்சி அலுவலா்கள் செந்தில், சந்திரசேகா், உதவி பொறியாளா்கள் குருபிரசாத், ஐசக் மற்றும் அதிகாரிகள் பங்கேற்றனா்.